Interesi për Hënën po rritet, veçanërisht kur po i afrohemi një uljeje të re, ose kthimit në sipërfaqen hënore, shkruan Klix, përcjell Fol Drejt.
Agjencitë hapësinore dhe kompanitë private në mbarë botën po planifikojnë misione hënore që do të realizohen në vitet e ardhshme, ndaj do të jetë e vështirë të vendoset koordinimi në lidhje me zona të ndryshme kohore. Prandaj, gjatë takimit të vitit të kaluar në qendrën e teknologjisë ESTEC në Holandë, e cila i përket Agjencisë Evropiane të Hapësirës, organizatat hapësinore diskutuan “rëndësinë dhe urgjencën e përcaktimit të kohës së referencës hënore”, në një deklaratë të re, inxhinieri i sistemit të navigimit të ESA, Pietro Giordano deklaroi se tani “po bëhen investime të përbashkëta ndërkombëtare për të arritur këtë qëllim”.
Për momentin, organizatat e ndryshme hapësinore përdorin ende zonat e tyre kohore për kronometrit e tyre dhe sistemet e tyre të komunikimit të dyanshëm. ESA tha se kjo “nuk do të jetë e qëndrueshme” në epokën e re të eksplorimit hënor. Misionet nga vende të ndryshme do të kryejnë vëzhgime të përbashkëta dhe mund të kenë nevojë të komunikojnë me njëri-tjetrin edhe nëse nuk punojnë drejtpërdrejt së bashku, por janë në sipërfaqen hënore në të njëjtën kohë.
Nga ana tjetër, nuk do të jetë e lehtë të mbash kohën hënore, sepse ka një sërë sfidash. ESA vëren se “lundrimi i saktë kërkon matjen rigoroze të kohës”, kjo është arsyeja pse një nga temat që grupi ndërkombëtar i organizatave hapësinore do të duhet të diskutojë është nëse duhet të ketë një organizatë të vetme përgjegjëse për ruajtjen e zonës kohore të Hënës. Për më tepër, do të duhet të merret një vendim nëse koha hënore do të jetë e sinkronizuar me kohën tokësore apo jo, sepse orët në Hënë funksionojnë më shpejt në bazë të pozicionit të satelitëve.
Ndërsa ka shumë faktorë për t’u marrë në konsideratë, çfarëdo që të dalë në fund të fundit do të duhet të jetë praktike për astronautët në orbitë ose që shkelin në sipërfaqen e Hënës. /FolDrejt/
