Presidentja e Republikës së Kosovës, Vjosa Osmani thotë se ka prova të pakundërshtueshme që e lidhin Serbinë aktin terrorist të para një javë në Banjskë të Zveçaqnit dhe se ata që e kryen s’ishin “vetëm një tufë qytetarësh”.
Osmani ndau në “X” një pjesë nga intervista e saj dhënë për televizionin britanik “4 Channel”, ku tha se Serbia “duhet të paguajë një çmim për këtë”.
“Ka prova të pakundërshtueshme që e lidhin Serbinë me aktin terrorist kundër Kosovës – nga trajnimi i terroristëve me ushtrinë serbe e deri te përdorimi i armëve të shkallës ushtarake të prodhimit serb. Serbia duhet të mbajë përgjegjësi dhe të marrë një mesazh të qartë se agresioni ka pasoja”, shkroi ajo.
E pyetur nëse sheh se në këtë ka duar Vladimit Putini, Osmani tha “duart e tij janë mbi këtë”. Kjo, sipas saj, dëshmohet edhe nga deklaratat publike që vijnë nga Moska.
