Presidentja e Republikës së Kosovës, Vjosa Osmani, ka mbajtur një konferencë të përbashkët për media, me Presidentin e Maqedonisë së Veriut Stevo Pendarovskin, shkruan Fol Drejt.
Presidentja, ndër të tjera ka folur për raportet e mira ndërfqinjësore që Kosova i ka ndërtuar me Maqedoninë e Veriut, duke i përmendur marrëveshjet e nënshkruara:
“Për herë të parë një president i një shteti fqinj e viziton Kosovën në vizitë zyrtare. Kjo vizitë jo vetëm që hap kapituj të ri të bashkëpunimit por konfirmon marrëdhëniet tashmë të shkëlqyera të Kosovës me Maqedoninë e Veriut. Kemi nënshkruar mbi 40 marrëveshje ndërkombëtare, disa memorandum ndërministrore si dhe nisma të tjera për marrëveshje të tjera që janë në proces të finalizimit.”
Por në mënyrë të posaçme ajo e ka falënderuar homologun e saj, për qasjen konstruktive ndaj Kosovës.
“E falënderoj presidentin Penadrovski personalisht për rolin e tij mbështetës për Kosovën përgjatë gjithë viteve sa ka shërbyer dhe vazhdon që të shërbejë tani si president. E jo vetëm atë por gjithë popullin e Maqedonisë së Veriut për kontributin e dhënë në mënyrë që Kosova të ecë përpara për sfidat me të ciklat është ballafaquar në arenën ndërkombëtare”.
Sipas presidentes, roli i Maqedonisë së Veriut rreth çështjes së liberalizimit të vizave, ka qenë i mirëpritur nga ana e Kosovës:
“Përkundër faktit që Kosova i ka plotësuar të gjitha kushtet për liberalizimin e vizave, BE-ja ende nuk e ka përmbushur premtimin. Me këtë rast e falënderoj presidentin Pendarovski që ka qenë zë i qartë për liberalizimin e vizave për Kosovën si vend fqinj”.
Presidentja Osmani është pyetur edhe rreth çështjes “Ballkani i Hapur”, por ajo ka tha se, Kosova ka rezerva për sa i përket iniciativës, ndërsa dyshon se atë do ta shfrytëzojë Serbia për ekspansionin e hegjemonisë së saj./FolDrejt/
