Pak orë para debatit të nesërm për çështjen e asociacionit të cilin e ka ftuar ambasada e Shteteve të Bashkuara të Amerikës (ShBA), opinioni publik në Kosovë po vlon nga debati, shkruan Fol Drejt.
Lidhja Demokratike e Kosovës (LDK), ka paralajmëruar pjesëmarrjen, ndërsa përfaqësuesit e saj nuk do të jenë të vetmit:
“Lidhja Demokratike e Kosovës, në këtë takim, do të konfirmojë edhe njëherë mbështetjen për procesin e dialogut të ndërmjetësuar nga BE-ja, me përfshirjen e plotë të SHBA-së. Orientimet e LDK-së për një marrëveshje përfundimtare, ligjërisht të obligueshme, dhe me njohjen reciproke në thelb të saj, mbesin të pandryshueshme.
Kompetencat dhe përgjegjësitë kushtetuese nuk kanë alternativë, prandaj LDK-ja, në rolin e saj opozitar, s’ka se si t’i ushtrojë ato. Opozita nuk mund t’i marrë përgjegjësitë e shumicës dhe as të Qeverisë së kësaj shumice. Prandaj pjesëmarrja e institucioneve shtetërore në këtë proces është domosdoshmëri e pazëvendësueshme”, thuhet në njoftimin e LDK-së.
Lëvizja Vetëvendosje nga ana tjetër, nuk dihet nëse do të marr pjesë në këtë debat, por zyrtarët e saj janë sot janë takuar me René Schlee drejtor i Friedrich Ebert Stiftung (FES), për Kosovë dhe Maqedoni të Veriut.
“Sot, në zyrën e Lëvizjes VETËVENDOSJE!, Sekretari Organizativ, Alim Rama dhe Sekretari për Marrëdhënie Ndërkombëtare, Hajrulla Çeku mirëpritën në takim drejtorin e FES për Kosovë dhe Maqedoni të Veriut, René Schlee.
Gjatë këtij takimi u vlerësua bashkëpunimi i mirë mes LV dhe FES ndër vite. U dakordua për koordinimin e bashkëpunimit për vitin 2023, me theks të veçantë në fuqizimin e kapaciteteve organizative, politikën publike dhe qeverisjen lokale. Bashkëpunimi në mes LV dhe Partisë Social Demokrate të Gjermanisë do të jetë një nga objektivat kryesore gjatë këtij viti në kuadër të rritjes së koordinimit me familjen Social Demokrate në BE dhe në botë.
Veç tjerash në këtë takim u ritheksua qëndrimi i LV kundër themelimit të një asociacioni dhe çdo marrëveshje tjetër mbi baza etnike.
Republika e Kosovës ka një nga sistemet më të mira në botë për mbrojtjen e të drejtave të komuniteteve jo shumicë, brenda kornizave ligjore/kushtetuese, thanë përfaqësuesit e LV gjatë takimit.
Ata ftuan FES që të bëjnë një studim krahasimor për respektimin e të drejtave të komuniteteve në Kosovë dhe në vendet e tjera përfshirë Serbinë” – thuhet në njoftimin e Vetëvendosjes.
Pjesëmarrjen në diskutim e kanë konfirmuar edhe Partia Demokratike e Kosovës (PDK) dhe Aleanca për Ardhmërinë e Kosovës (AAK).
Sot ndërkaq, shumë deputetë nga radhët e Vetëvendosjes, kanë shprehur qëndrimin kundër formimit të asociacionit. Sipas tyre, një veprim i tillë do ta rrezikonte statusin e republikës./FolDrejt/
