Palestinezët që jetojnë në rajonin Burqa në afërsi të qytetit Nablus të Bregut Perëndimor nën pushtim theksojnë se kthimi këtu i kolonëve hebrenj do të shkaktojë tensione dhe konflikte në rajon, transmeton Fol Drejt.
Autoritetet izraelite në vitin 2005 me planin e tyre të “aneksimit të njëanshëm” vendosën që të evakuojnë të gjithë vendbanimet në Gaza dhe 4 njësi vendbanimi të vogla në Bregun Perëndimor përfshirë edhe vendbanimin Humesh në rajonin Burqa, raporton AA.
Kolonët hebrenj për t’u kthyer sërish në vendbanimin Humesh të zbrazur në vitin 2015, kohët e fundit kryejnë veprime dhe sulme ndaj shtëpive të palestinezëve në rajon.
Edhe palestinezët në rajon reagojnë ndaj planit me sulme të kolonëve hebrenj për t’u kthyer këtu.
Prej rreth 2 javësh në rajon po përjetohen tensione mes palestinezëve dhe kolonëve hebrenj dhe ushtarëve izraelitë që i mbrojnë ato. Ushtarët izraelitë kanë plagosur me plumba të vërtetë dhe plastikë dhjetëra palestinezë në përpjekje për të reaguar ndaj kolonëve hebrenj.
Rrugët e rajonit Burqa, kohët e fundit ngjasojnë me një fushëbetejë. Në rrugë shihen bombat e gazit lotsjellës dhe tym intensiv për shkak të gomave të automjeteve që digjen. Gjithashtu nëpër rrugë vërehen barriera prej rëre dhe të gomave si dhe kapsulat e bombave të gazit.
Për shkak të konflikteve dhe sulmeve është shkaktuar ndërprerje edhe në arsim ndërkohë që është pezulluar edhe mësimi në shkolla.
Në rajon vazhdojnë tensionet mes kolonëve hebrenj dhe palestinezëve.
Janë plagosur rreth 200 palestinezë
Gassan Daglas, përgjegjësi i Dosjes së Vendbanimeve të Kolonëve Hebrenj në veri të Bregut Perëndimor pranë Organizatës për Çlirimin e Palestinës (PLO), në një deklaratë për AA tha se që nga dita kur filluan ngjarjet e fundit kolonët hebrenj kanë sulmuar 25 shtëpi të palestinezëve, kanë thyer xhamet dhe kanë bërë përpjekje për t’i djegur ato.
Ai tha se edhe ushtarët izraelitë kanë plagosur me plumba të vërtetë dhe plastikë rreth 200 palestinezë, qindra të tjerë janë përballur me rrezikun e mbytjes nga bombat e gazit të hedhur ndërkohë që janë arrestuar 5 palestinezë.
Abdullah Seyf, një palestinez nga banorët e Burqa-s, tha se popullata e rajonit është e shqetësuar nga rikthimi sërish i kolonëve hebrenj të cilët u evakuuan në vitin 2005.
“Popullata e Burqa-s nuk do të lejojë që hebrenjtë të rikthehen në njësitë e vendbanimeve të paligjshme”, theksoi Seyf i cili shtoi se “Kthimi i kolonëve do të thotë rifillimi i tensioneve dhe konflikteve”.
Koordinatori i Grupeve Palestineze në Burqa, Fatin Salah vuri në dukje se rikthimi i kolonëve do të përshkallëzojë tensionet. “Populli ynë në Burqa dhe zonat përreth ka vendosur që të luftojë kundër rikthimit të kolonëve këtu dhe që të mos e lejojë këtë”, tha Salah.
“Territoret tona i mbrojmë vetëm me trupat tanë. Nuk posedojmë asgjë tjetër përveç gurëve. Ne kemi vullnet dhe me vullnetin tonë të fortë ne do të fitojmë”, tha ai.
Duke vënë theksin se populli i zonës mbron rajonin kundër sulmeve të kolonëve hebrenj dhe ushtarëve izraelitë, Salah potencoi se ushtarët izraelitë luftojnë për të frikësuar popullin por që vullneti i palestinezëve është i fuqishëm.
Ndaj ushtrisë izraelite që mbron kolonët hebrenj ka reaguar edhe palestinezi Nidal Abdulhadi duke thënë se gjatë ndërhyrjes së ushtarëve izraelitë janë dëmtuar shumë shtëpi, se janë plagosur një numër i madh personash dhe se krahas kolonëve hebrenj po luftojnë edhe me ushtrinë.
“Vetëm me trupat tanë dhe gurët tanë po luftojmë me një ushtri të pajisur plotësisht”, tha Abdulhadi.
Në Bregun Perëndimor të cilin Izraeli e pushtoi në vitin 1967 ndodhen mbi 250 vendbanime të paligjshme të kolonëve hebrenj. Rreth 450 mijë kolonë hebrenj që banojnë në këto vende, e vështirësojnë edhe më shumë jetën për palestinezët që jetojnë në Bregun Perëndimor nën pushtim.
Sipas ligjit ndërkombëtar, të gjitha vendbanimet hebreje në territoret e pushtuara konsiderohen të paligjshme.
