Dhjetëra palestinezë u mblodhën para Konsullatës suedeze në Kudsin Lindor të pushtuar dhe protestuan ndaj Suedisë për lejimin e sulmeve që synojnë Kuranin, raporton Anadolu, transmeton Fol Drejt.
Reagimet kundër Suedisë vazhdojnë nga bota islame për faktin se Salwan Momika me origjinë irakiane, i cili dogji Kuranin më 28 qershor në kryeqytetin suedez Stokholm, kreu të njëjtin sulm para ambasadës së Irakut në Suedi më 20 korrik.
Me thirrjen e Këshillit të Lartë Islam në Kudsin Lindor, dhjetëra palestinezë organizuan një protestë para Konsullatës suedeze.
Duke mbajtur Kuranin në duar, turma recitoi vargje nga libri i shenjtë. Policia izraelite u vendos në zonë, por nuk pati asnjë ndërhyrje.
– Theksimi i “Përkushtimit ndaj Kuranit” nga Ikrime Sabri
Duke folur për Anadolu, Shejh Ikrime Sabri, i cili mori pjesë në demonstratë tha se: “Ky qëndrim i besimit është për të mbështetur librat e Allahut të Madhëruar dhe është një qëndrim që konfirmon përkushtimin tonë ndaj Kuranit, të cilin Allahu na e ka besuar neve”.
Shejh Sabri deklaroi se ata dënuan jo vetëm ata që kryen krimin e djegies së Kuranit, por edhe qeverinë suedeze që e lejoi atë.
Imami theksoi se përsëritja e këtij krimi do të thotë se “vendet arabe dhe islame nuk mbajtën qëndrim serioz kundër këtij agresioni”.
Si pjesë e protestës, zyrtarë të Këshillit të Lartë Islam i dërguan letër Konsullatës së Përgjithshme Suedeze në Kudsin Lindor, duke bërë thirrje që “liria e shprehjes nuk duhet të nënkuptojë kurrë përdhosjen e librave të shenjtë”.
