I burgosuri palestinez Khader Adnan, i cili ishte i lidhur me grupin e Xhihadit Islamik palestinez, vdiq në një burg izraelit pas 86 ditësh grevë urie, shkruan Klix, përcjell Fol Drejt.
Shërbimi i Burgjeve të Izraelit (IPS) tha se ai u gjet pa ndjenja herët në mëngjesin e së martës. Ai u dërgua në spital, por përpjekjet për ta shpëtuar rezultuan të pasuksesshme. IPS tha se ai refuzoi t’i nënshtrohej testeve dhe trajtimit mjekësor.
Izraeli aktualisht mban më shumë se 1,000 të burgosur palestinezë pa akuza apo gjyq, numri më i lartë që nga viti 2003, sipas grupit izraelit të të drejtave të njeriut HaMoked.
Agjencia palestineze e lajmeve WAFA raportoi se Adnani, 44 vjeç, nga qyteti Arrab pranë qytetit të Jeninit në Bregun Perëndimor të pushtuar, refuzoi të hante për 87 ditë në shenjë proteste ndaj paraburgimit të tij pa akuza, sipas Shoqatës së të Burgosurve Palestinez.
“Kjo është një gjë shumë e rrezikshme që ka ndodhur,” tha Mustafa Barghouti, ish-ministër palestinez i informacionit dhe sekretar i përgjithshëm i partisë politike Iniciativa Kombëtare Palestineze.
Qeveria izraelite dhe ministri i Sigurisë Kombëtare Itamar Ben-Gvir “janë personalisht përgjegjës për këtë akt të vrasjes”, tha Barghouti.
“Unë e quaj atë një akt vrasjeje, sepse qeveria izraelite dhe gjykatat e saj ushtarake e dinin shumë mirë se një person në grevë urie për 87 ditë, të cilit nuk iu dha ndihmë mjekësore, mund të vdiste në çdo moment. Dhe pikërisht kjo ndodhi”, tha Barghouti. /FolDrejt/
