Përderisa krerët e dy vendeve që janë palë negocimi në Bruksel, po rreken ta bindin opinionin publik respektiv për sa i përket asaj se kush ishte palë kooperuese, e kush orvatej të bënte hile, simbolika e afërsisë me Shtetet e Bashkuara të Amerikës (ShBA), mund të shfrytëzohet në luftën diplomatike.
Kështu të paktën ka paraparë njohësi i zhvillimeve politike Dr. Gurakuç Kuçi, shkruan Fol Drejt.
“Serbia për të treguar afërsi me SHBA-në pritet që ta shkarkojë Vulinin nga pozita e shefit të BIA-së” – ka shkruar Kuçi në një reagim në Fb.
Sipas tij, një aset që konsiderohej në duart e Kosovës, nuk e ka shfrytëzuar mjaftueshëm kjo e fundit, e madje rrezikon që t’i rrëshqas në “duart” e Sërbisë.
“Pra, diplomacia alternative e Serbisë edhe pse është mashtruese, po ia merr aleatët diplomacisë vetizoluese të Kosovës. Kjo e fundit vazhdon të mos dijë t’i materializojë veprimet e veta, ashtu si dikur qeveria Haradinaj që nuk dinte çfarë të bënte pasi e vendosi taksën 100% ndaj produkteve serbe, por gjeti një arsye dhe dha dorëheqje.”
Ua kujtojmë se më 11 korrik në Uashington, Zyra për Kontrollin e Aseteve të Huaja në Departamentin amerikan të Thesarit ka bërë të ditur se Drejtori i Agjencisë për Siguri dhe Informacion i Serbisë (BIA), Aleksandar Vulin, është futur në listën e sanksioneve amerikane.
Ditë më parë opozitarja “Danas” shkruante se shkarkimi i tij nga pozita e Drejtorit të BIA-s, mund të ndodh shumë shpejt./FolDrejt/
