Parlamenti Evropian bëri thirrje sot për miratimin e sanksioneve të reja kundër regjimit të Aleksandër Lukashenkos për shkak të represionit të opozitës në Bjellorusi dhe mbështetjes së Minskut për luftën që Rusia po zhvillon kundër Ukrainës, shkruajnë mediat e huaja, përcjell Fol Drejt.
Në rezolutën, e cila u miratua me një shumicë të madhe (557 pro, 25 kundër, 40 abstenime), eurodeputetët i bëjnë thirrje BE-së të “zgjerojë dhe forcojë” sanksionet kundër atyre që janë përgjegjës për shtypjen e opozitës bjelloruse, dhe në veçanti të rekomandojë sanksionimin gjyqtarët, prokurorët, oficerët e policisë dhe oficerët e burgjeve.
Me rezolutë, eurodeputetët dënojnë dëshirën e regjimit të Lukashenkos për të “heshtur zërat e pavarur dhe për të shtypur lirinë e shprehjes” me dënime të reja si ato të vendosura ndaj aktivistëve Aleš Byjatsky, bashkëfitues i Çmimit Nobel për Paqen 2022 dhe gazetarit Andrzej Pocobut në fillim të marsit.
Të dy janë të burgosur në Bjellorusi.
Eurodeputetët shprehin keqardhjen që Bjellorusia nuk është përfshirë në grupin e dhjetë të sanksioneve evropiane kundër Rusisë.
BE-ja sanksionoi në mënyrë specifike disa kompani iraniane të akuzuara për furnizim me dronë në Moskë.
Rezoluta u bën thirrje vendeve të BE-së të lëshojnë “viza urgjente” për mbrojtësit e të drejtave të njeriut në Bjellorusi për t’i lejuar ata të largohen nga vendi dhe u bën thirrje vendeve anëtare të bëjnë presion ndaj Komitetit Olimpik Ndërkombëtar që të ndryshojë vendimin e tij për të lejuar sportistët bjellorusë të marrin pjesë në Lojërat Olimpike në Paris në 2024, sepse “është kundër izolimit të shumëfishtë të Bjellorusisë dhe do të përdoret nga regjimi për qëllime propagandistike”. /FolDrejt/
