Një parti e koalicionit të krahut të djathtë në qeverinë italiane e udhëhequr nga kryeministrja Giorgia Meloni ka përgatitur një projektligj që synon të ndalojë hapësirat e lutjes muslimane jashtë xhamive, sipas mediave lokale, transmeton AA, përcjell Fol Drejt.
Projektligji i propozuar nga partia Vëllezërit e Italisë (FdI), i cili aktualisht po debatohet në komisionin e mjedisit të parlamentit, synon të ndalojë përdorimin e garazheve dhe depove industriale si xhami, raportoi të shtunën e përditshmja 24 Ore.
Organizatat kulturore dhe fetare që nuk kanë nënshkruar një marrëveshje me shtetin italian nuk do të lejohen të përdorin një pronë si vend kulti, shkruan e përditshmja, duke shtuar se komuniteti musliman i vendit nuk ka nënshkruar asnjë marrëveshje të tillë me shtetin. Projektligji, sipas të përditshmes, u kundërshtua nga ligjvënësit e partive opozitare në komisionin parlamentar të mjedisit, të cilët thanë se nëse miratohej, do të kufizonte lirinë e fesë.
Sami Salem, imam ose udhëheqës i lutjes në Xhaminë Magliana në Romë, i tha të përditshmes se “Është një projektligj që diskriminon qartë muslimanët dhe nuk respekton Kushtetutën italiane që mbron të gjithë qytetarët që jetojnë në Itali”.
Izzeddin Elzir, një tjetër imam i komunitetit musliman në provincën veriore të Firences, shprehu shqetësimet e tij për ligjshmërinë e projektligjit. /FolDrejt/
