Tensionet janë rritur përgjatë kufirit izraelito-libanez dhe ushtria libaneze u vu në gatishmëri të dielën pas raportimeve se një patrullë IDF kishte kaluar kufirin, shkruan Klix, përcjell Fol Drejt.
“Një patrullë armike izraelite kaloi vijën blu në Aita al-Shaab [Libani i Jugut], në një distancë prej afërsisht një metër,” tha ushtria libaneze në një deklaratë.
Vija blu është kufiri i përkohshëm i shpallur nga OKB-ja më 7 qershor 2000, pas tërheqjes së Izraelit nga Libani.
“Një patrullë e ushtrisë libaneze erdhi dhe e detyroi patrullën e armikut të tërhiqej pas Vijës Blu drejt territoreve të pushtuara palestineze. Një patrullë e Përkohshme e Kombeve të Bashkuara në Liban [UNIFIL] mori pjesë gjithashtu për të verifikuar shkeljen,” shtoi deklarata.
“Ne jemi të vetëdijshëm për tensionin përgjatë vijës blu në zonën Aita al-Shaab, ku disa punë izraelite të mirëmbajtjes janë duke u zhvilluar,” tha një zëdhënës i UNIFIL për L’Orient Today të Libanit.
Ai shtoi se forcat paqeruajtëse të UNFIL janë të pranishme për të de-përshkallëzuar situatën.
“Paqeruajtësit tanë janë në terren për të de-përshkallëzuar situatën. Ne u bëjmë thirrje të gjitha palëve dhe të gjithë të pranishmëve në vendngjarje për paqe. Çdo lloj pune pranë Linjës Blu është jashtëzakonisht e ndjeshme dhe ne vazhdojmë t’u kërkojmë të gjitha palëve që të koordinohen përmes UNIFIL për shmangien e tensioneve të panevojshme”, tha zëdhënësi.
Duke cituar një gazetar nga televizioni Al-Manar i Hezbollahut, L’Orient Today raportoi gjithashtu se tensionet u ndezën pasi “një oficer i ushtrisë libaneze shtyu një ushtar izraelit dhe hoqi një shtyllë të hekurt që ushtari po vendoste në shkelje të Linjës Blu”. /FolDrejt/
