Veç “fjalëve të urta” të përdorura gjatë konferencës të mbajtur sot paradite, Kryeministri Albin Kurti ndër të tjera akuzoi Miroslav Lajçakun për anshmëri, se si ai “është pozicionuar nga Serbia kundër Kosovës”, shkruan Fol Drejt.
Fjala e Kryeministrit Kurti në konferencën e sotme ka marrë vëmendje në opinionin publik, ndërsa po komentohet, e madje edhe kritikohet, për fjalët që i tha.
“Në takimin e dytë, me Vuçiqin u ekspozova para një skenari, ku Lajcak e kishte dizajnuar kohë më parë. Ua propozova planin e punuar nga Kosova, është dokumenti i parë që e propozoj në nivel të lartë, presidenti Vuciq dhe Lajçak reaguan me të njëjtin mendim, të dy thanë se ky plan është jo realist, dhe rruga e vetme përpara është statuti i Asociacionit. Pasi u refuzova ua shtrova një pytje, nëse po refuzoni propozimin tim, më thoni nëse Serbia ka bërë plan, Lajçak tha po, Serbia tha se po. Unë insistova që ta shoh propozimin, por që ai nuk ekzistonte”, ka thënë mes tjerash.
Por pas këtyre fjalëve shumë prej njohësve të zhvillimeve, e kanë cilësuar fjalimin e tij si tregues të naivitetit politik e diplomatik. Sipas gazetarit Lirim Mehmetaj, Kryeministri Kurti ka harruar se si i mbronte Josep Borrell-in dhe Miroslav Lajçakun në parlament, kur këta shiheshin me dyshim nga ish presidenti Hashim Thaçi:
“Kur ishte caktuar Lajçak si ndërmjetësues, Hashim Thaçi në disa raste kishte treguar që ai është problematik si person të caktohet në atë pozicion.
Ishte munduar edhe ta tregojë anshmërinë e Lajçakut dhe qasjen e tij anti-Kosovë.
Kurti e kishte kritikuar ashpër Thaçin.
I kishte thënë se është “president anti-evropian”. E kishte qortuar se po flet keq për Lajçakun dhe u kishte treguar kosovarëve se “kjo është gabim”.
Sot Kurti na tregoi se Lajçaku është përfaqësues i Serbisë në Dialog.
Çka i thotë njeri këtij? Hajt çka?
Dëgjoni videot.”
Si të papjekur në praktikë e ka cilësuar edhe gazetari Sefer Zogaj. Në një koment të tij të shkurtër në llogarinë e tij në Facebook, Zogaj ka shkruar se “Kurti i cili tash po del prej botës teorike me faqe t’bardha t’librash – njëjti sikur studenti kur pas studimeve del në tregun e punës.”:
“Nervoza Albin Kurtit,
Me pak njohuri për psikologjinë qartazi shihet se Kurti është i çorientuar në procesin e dialogut. Ka një thyerje në mes besimeve të veta për diplomacinë dhe realitetit praktik. Me gjasë, Kurti ka besuar se kapaciteti i përfaqësuesit të shtetit është mbi kapacitetet e vetë shtetit. Tavolina diplomatike ndryshon formë, aty ka norma – e norma kryesore mbi gjykimin është fuqia e subjektit. Kurti s’e ka besuar, por me gjasë tash po – në pamundësi për t’i thyer bindjet e gabuara tash sulmon Lajçakun.
Pra, Kurti ka besuar se ai si politikan i dijshëm, i pakorruptuar e pa të kaluar kriminale nuk mund t’i bëhet presion. Por ka gabuar në gjykim, sepse në sytë e perëndimit Kurti s’është ai djaloshi prishtinas, por kryeministri i Kosovës – që përfaqëson Kosovën, e Kosova nuk e ka të sigurt sigurinë territoriale, energjinë e as grurin.
Pra, edhe presidenti kinez mund të vihet në presion po u kërcëua me sanksione në tregti ndërkombëtare. Lërë më Kurti i cili tash po del prej botës teorike me faqe t’bardha t’librash – njëjti sikur studenti kur pas studimeve del në tregun e punës. Ndryshon, pra.”
Edhe njohësi i zhvillimeve politike Fitim Salihu, s’ka qenë fare i butë në komentimin e fjalimit të konferencës:
“Kur ne mars thojshim qe Albini e ka pranu ne Oher nje marreveshje me Zajednice dhe pa njohje, u gjujshit si qafka me t’i nxjerre syte per ate marreveshje. Bile vete Albini e ka pas mbrojte marreveshjen edhe ne TV edhe ne Kuvend. Tash po thote qe marreveshja ish e keqe se paska Zajednice e s’paska njohje. Jo hedi…
E pse e mbrojshe pra o pus? Dmth ky eshte kryeministri gjenial qe as e paska dite se me çka po dakordohet dhe te cilit i duhen 6 muaj me kuptu se me çka eshte dakordu. 🤦🏻♂️
PS: Ani kah fundi tha “une kurre nuk lodhem”. 🤣 Tybe pa punu nuk lodhem as une. Çu more punoni najsen se gati e krytet nji mandat 4-vjeçar pa e kry asnji pune e veç tu kukat. Me pas jetu para nja 80 vjeteve, sigurisht vajtojca kish me qene profesioni me adekuat per juve.”
Përndryshe Kryeministri nuk u shfaq vetëm akuzues kundrejt Miroslav Lajçakut, a ironik me presidentin Aleksandër Vuçiq kur tha se “i kam thënë Vuçiqit nuk mund ta jap kafen pa filxhan”, por edhe thumbues me opozitën. Për këtë të fundit tha se nuk dëshiron ta zhdukë tërësisht, por ta mund në zgjedhjet e ardhshme./FolDrejt/
