Republika e Maqedonisë së Veriut, që nga sot, ka marr kryesimin me Procesin e Bashkëpunimit në Evropën Juglindore (PBEJL).
PBEJL është forum unik që i përfshin të 13 vendet e Evropës Juglindore, mes të cilave, pjesa më e madhe janë anëtarë të NATO-s, anëtarë apo kandidatë për në BE, por edhe pjesë e OSBE-së.
Në konferencën e sotme për gazetarë, Ministri i Punëve të Jashtme Bujar Osmani theksoi se “rajoni aktualisht po përballet me tri procese jashtëzakonisht të rëndësishme, të ndara, por të gërshetuara: Nevojën për integrim të menjëhershëm në BE, jo më vonë se në vitin 2030, pasqyrën komplekse gjeopolitike të kontinentit evropian, lidhur me agresionin ushtarak rus në Ukrainë dhe kontestet e pazgjidhura dypalëshe.”
Sipas tij, këto tri elemente ndikojnë drejtpërdrejt në dinamikën e lëvizjeve të përgjithshme në rajon, andaj duhet pasur kujdes në gërshetimin e tyre.
Për shkak të gjithëpërfshirjes së saj, PBEJL-ja paraqet platformë të shkëlqyer për dialog politik, ku çështjet rajonale mund të trajtohen në nivelin më të lartë, duke hapur kështu rrugën për integrim evropian dhe euroatlantik të rajonit të Evropës Juglindore.
Osmani po ashtu prezantoi sloganin e kryesimit:
“Tejkalojmë ndarjet, ndërtojmë besim!”/FolDrejt/
