Udhëheqësi i Koresë së Veriut Kim Jong Un dhe presidenti rus Vladimir Putin kanë përfunduar takimin e tyre në Rusi, raporton Al Jazeera, transmeton Fol Drejt.
Bisedimet zgjatën nga katër deri në pesë orë, sipas raporteve të mediave lokale.
Kim i ofroi Putinit “mbështetje të plotë dhe të pakushtëzuar” të vendit të tij për “luftën e shenjtë” të Rusisë për të mbrojtur interesat e saj të sigurisë.
Ai tha se Pheniani do të qëndrojë gjithmonë me Moskën në frontin “anti-imperialist”.
Presidenti rus Vladimir Putin dhe lideri i Koresë së Veriut Kim Jong Un zgjodhën një qytet në rajonin e largët lindor të Rusisë. Ata ekzaminuan një platformë lëshimi gjatë takimit të tyre në kozmodromin Vostochny jashtë qytetit të Tsiolkovsky, rreth 200 kilometra (125 milje) nga qyteti i Blagoveshchensk.
Përndryshe lufta ka vijuar e ashpër edhe sot. Kievi zyrtar ka thënë se 105 objekte të infrastrukturës portuale të Ukrainës janë dëmtuar në sulmet ruse që nga 18 korriku.
Zëvendëskryeministri Oleksandr Kubrakov citohet të ketë thënë se eksportet ukrainase të grurit kishin rënë me pothuajse 3 milionë tonë në muaj që nga 18 korriku, një ditë pasi Rusia u largua nga marrëveshja e eksportit të grurit të mbështetur nga OKB-ja në Detin e Zi.
“Që nga 18 korriku, për shkak të sulmeve ruse në portet e Ukrainës, 105 objekte të infrastrukturës portuale janë dëmtuar dhe shkatërruar pjesërisht. Si rezultat i goditjeve në portet e grupit të Danubit dhe bllokimit të porteve detare, eksportet e grurit në Azi, Afrikë dhe Evropë u reduktuan me pothuajse 3 milionë tonë në muaj”, shkroi Kubrakov në Facebook.
E megjithatë, Rusia është orvatur të krijojë lidhje të reja, partnerë të tjerë strategjikë, të cilët e mbështesin në misionin e saj. Në këtë vazhdë orvatjesh po shihet edhe takimi i Putinit me Kim Jong Un-in, liderin e Koresë Veriore./FolDrejt/
