Presidentja e Republikës së Kosovës Vjosa Osmani, ka mbajtur fjalimin e saj vjetor përpara deputetëve në Kuvendin e Kosovës, transmeton Fol Drejt.
Presidentja Osmani, nëpërmjet foltores së parlamentit, u është adresuar edhe qytetarëve të vendit.
Megjithatë, dy grupe parlamentare, ai i Partisë Demokratike të Kosovës (PDK), dhe ai i Aleancës për Ardhmërinë e Kosovës (AAK), nuk kanë qenë prezent gjatë këtij akti.
Sipas Kryetarit të Grupit Parlamentar të PDK-së Abelard Tahiri:
“Duke i shërbyer agjendës politike të qeverisë dhe mazhorancës, Presidentja Osmani ka dështuar të shërbejë si përfaqësuese e unitetit të popullit. Mandati i saj i deritanishëm është karakterizuar nga një numër shkeljesh dhe dështimesh.”
Ai nëpërmjet një postimi në llogarinë e tij në Facebook, ka varguar një sërë dështimesh, të cilat janë arsye e mjaftueshme për të mos e dëgjuar fjalimin e saj.
Për një qëndrim të ngjashëm, ka dhënë sqarime edhe Grupi i AAK-së.
“Grupi Parlamentar i AAK-së, në shenjë mospajtimi dhe revolte për faktin se Presidentja e ka shkelur mandatin e vet si faktor uniteti, duke u bërë palë me Kryeministrin, ne si grup parlamentar refuzojmë ta dëgjojmë fjalën e Presidentes dhe e braktisim seancën.”
Duket që të dy grupet në fjalë, nuk i kanë harruar përplasjet e vjetra me Osmanin, dhe në shenjë revolte kanë dashur t’i hakmerren./FolDrejt/
