Muhamet Shabani në librin e tij “Degradimi i Pavarësisë së Kosovës” e nxjerr fajtor ish kryetarin e Partisë Demokratike të Kosovës Hashim Thaçin, duke e akuzuar deri në “tradhti”, ndërsa gjen përkrahje nga vetë pushteti i PDK-së në Ferizaj, shkruan Fol Drjet.
“Alarmin” për këtë skandal e ka vënë një anëtar i kësaj partie, njëherësh ish zëvendësministër – Nehat Mustafa.
“Skandaloze – Komuna e Ferizajt sponsorizon për botim librin që akuzon deri në tradhti ish krerët e UÇK dhe PDK që janë në Hagë“, ka thënë Mustafa.
Ish-zëvendësministri deklaron se libri është sponsorizuar nga Drejtoria e Kulturës në Ferizaj në vitin 2021, dhe përveç akuzave që peshojnë rëndë mbi Hashim Thaçin, aty sulmohet edhe ish-kryetari i Kuvendit, Kadri Veseli.
“Ditë më parë dëgjova që Komuna e Ferizajt ( Drejtoria e Kulturës, Rinisë dhe Sportit), në vitin 2021 kishte sponorizur për botim një libër në të cilin sulmoheshin në mënyrën më të ulët ish krerët e UÇK-së që tanimë ishin padrejtësisht në Hagë, e me theks të veçantë ish krerët e PDK, respektivisht ish Presidenti Thaçi dhe ish Kryekuvendari Veseli“, thuhet në reagimin e tij.
Për këtë ishte bindur pasi kishte siguruar një ekzemplar të librit:
“Fillimisht nuk e besova këtë lajm dhe fillova të kërkoj një exemplar të librit. Kudo që kërkoja hezitonin të ma huazonin, mbase e dinin se unë edhe mund ta bëja publike këtë paturpësi institucionale. Më në fund arrita ta gjejë një exemplar të librit “Degradimi i Pavarësisë së Kosovës “.
Me të filluar shfletimin , menjëhër bindem për ato që kisha dëgjuar lidhur me përmbajtjen e librit. Në këtë postim timin, unë nuk do merrem me analizën ( kritikën ) e librit, dhe as nuk dua të hapë polemikë me autorin, sepse konsieroj që secili ka të drejtë të shprehë mendimet e tija dhe kjo është lirija e fjalës e njohur edhe me kushtetutën tonë. Dallimi është se bindjet private duhet të financohen nga vet autorët, donatorë privat apo organizata që nuk financohen nga taksat e qytetarëve” – ka vijuar ai.
Ai më tej ka kërkuar nga Komuna e Ferizajt e cila udhëhiqet nga PDK, sepse sipas tij, ajo ka “obligim moral që të deklarohet publikisht se si qëndron e vërteta e sponzorizimit të këtij libri ku ish krerët e luftës e të shtetit dhe po ashtu ish themeluesit e udhëheqësit e PDK konsiderohen degradues e shkatërrues të Pavarësisë së Kosovës; njerëz që qëndrojnë prapa vrasjeve politike; njerëz që udhëheqin këtë parti nga HAGA; njerëz që kanë zbatu e implementu planet serbo – ruse, etj. Sulmohen e etiketohen edhe udhëheqësit e tanishëm të PDK, fyhen e bullizohen deputetë të saj dhe jo pa qëllim të gjithë nga një zonë e caktuar.”
Për më shumë, ai e ka shoqëruar postimin e tij me fotografi./FolDrejt/
