Presidenti i Maqedonisë së Veriut, Stevo Pendarovski, pas takimit të Këshillit të Sigurisë ka bërë të ditur se këshilli do t’i propozojë qeverisë të shpallë gjendje krize në mbarë territorin e vendit në një periudhë kohore prej 30-ditësh, raporton Anadolu Agency (AA).
Këshilli i Sigurisë, i thirrur nga presidenti Pendarovski, ku përveç anëtarëve të këshillit i ftuar ishte edhe ministri i Shëndetësisë, Venko Filipçe, diskutoi situatën aktuale të vendit me pandeminë e koronavirusit të ri (COVID-19) dhe aktivitetet e institucioneve kompetente për të frenuar përhapjen e virusit.
Pas takimit, në konferencën e përbashkët për media me kryeministrin Zoran Zaev dhe ministrin Filipçe, presidenti Pendarovski njoftoi se Filipçe ka informuar këshillin për kapacitetin e spitaleve dhe për numrin e madh të pacientëve nëpër spitale, ndërsa Zaev ka informuar për punën dhe angazhimin e institucioneve kompetente në parandalimin e përhapjes së pandemisë.
“Situata me koronavirusin në vendin tonë është jashtëzakonisht serioze. Ajo që në të gjitha vendet përreth nesh, në rajon, Evropë dhe botë, praktikisht pa përjashtim situata është shumë e rëndë dhe shumë më e rëndë nga vala e pranverës, nuk do të thotë se nuk duhet të mendojmë për masa të reja të mundshme ose të shqyrtojmë efektet e atyre ekzistuese, me qëllim për të kufizuar përhapjen e virusit. Nga ky këndvështrim kemi arritur në përfundim që Këshilli i Sigurimit t’i propozojë qeverisë të shpallë gjendje krize në të gjithë territorin e vendit në periudhë 30-ditore”, deklaroi Pendarovski.
Ai njoftoi se shpallja e gjendjes së krizës mundëson që Ligji për mbrojtje dhe Ligji për ballafaqimin me krizat të ofrojnë mundësi më të gjera për mbështetje nga ushtria të institucioneve kompetente, parasëgjithash të institucioneve të shëndetësisë. Ndërsa rëndësia tjetër e gjendjes së krizës, siç tha presidenti, është se i mundëson qeverisë të menaxhojë burimet e organeve shtetërore, ndërmarrjeve publike, komunave, si dhe të shoqërisë tregtare që në këtë rast janë objektet shëndetësore private.
“Nuk bëhet fjalë për shtetëzim të spitaleve private, por për eventualisht menaxhim të tyre në betejën kundër pandemisë”, tha Pendarovski, duke iu referuar objektet shëndetësore private.
Presidenti i Maqedonisë së Veriut po ashtu tha se shpallja e gjendjes së krizës nuk ka kurrfarë lidhje me orën policore dhe njoftoi se kjo masë është në kompetencë të Komisionit për Sëmundje Ngjitëse dhe në fund të qeverisë nëse ajo vlerëson se një masë e tillë duhet të zbatohet.
Ndërkaq, kryeministri Zaev njoftoi se qeveria dhe institucionet e saj janë plotësisht të gatshme, sepse mundësia ishte njoftuar.
“Tani pas marrjes së vendimit, kthehem në qeveri dhe do t’i jap urdhrat komitetit drejtues, i cili në një afat sa më të shkurtë kohor t’i propozojë qeverisë shpalljen e gjendjes së krizës. Më së voni nesër në mbrëmje do ta mbajmë seancën qeveritare. Nëse janë të gatshme të gjitha institucionet në aspektin juridik dhe formal për domosdoshmërinë e shpalljes së gjendjes së krizës ne jemi të gatshëm sonte atë ta bëjmë. Por më së voni deri nesër në mbrëmje besoj se do të arrijmë të shpallim 30 ditë gjendje krize”, deklaroi Zaev.
Ministri Filipçe, nga ana e tij, duke përmendur stërmbushjen e kapaciteteve të spitaleve, theksoi se na pret një periudhë kritike që do të ketë nevojë për kapacitete shtesë nëpër spitale.
Aktualisht në Maqedoninë e Veriut në fuqi janë disa masa kundër përhapjes së pandemisë, përfshirë mbajtja e detyrueshme e maskave në hapësira të brendshme dhe të jashtme, puna e objekteve hotelerike, restoranteve dhe kafeneve deri në orën 21:00 si dhe ndalimi i grupimeve mbi katër persona në hapësira të brendshme apo të jashtme.
Presidenti Pendarovski për herë të parë gjendje të jashtëzakonshme në mbarë territorin e vendit shpalli më 18 mars. Më tej, ai disa herë zgjati gjendjen e jashtëzakonshme deri më 14 qershor kur edhe tërhoqi plotësisht këtë masë.
Po ashtu vendi ka zbatuar orë policore, vendim nga qeveria që filloi të zbatohet nga 22 marsi në periudha të ndryshme kohore dhe më 27 maj në kuadër të masave lehtësuese u vendos për heqjen e kufizimit të lëvizjes së lirë të qytetarëve.
Javëve të fundit në Maqedoninë e Veriut është rritur ndjeshëm numri i infeksioneve me COVID-19. Së fundmi, brenda 24 orëve vendi regjistroi rekord prej 1.406 rastesh të reja si dhe 21 viktima.
Që nga shpërthimi i koronavirusit, Maqedonia e Veriut ka regjistruar gjithsej 50.015 raste me COVID-19, përfshirë 1.397 vdekje dhe 29.583 të shëruar. Rasti i parë i infektuar me koronavirus në këtë vend u raportua më 26 shkurt tek një grua e ardhur nga Italia, më 6 mars u raportuan dy raste të tjera ndërsa më 22 mars u regjistrua vdekja e parë.
