Sulmi në veri të Kosovës tregon se BE-ja është duke u rrënuar. Brukseli më në fund duhet të pranojë se dialogu ndërmjet Beogradit dhe Prishtinës ka dështuar. Arsyeja kryesore për këtë janë politikat destruktive të presidentit serb.
Jo pa ligësi, Kremlini vuri në dukje se përleshjet vdekjeprurëse të fundjavës në Kosovë midis policisë dhe sulmuesve të armatosur të panjohur më parë ishin “potencialisht të rrezikshme”.
Sulmuesit me shumë gjasa ishin serbë, dhe Moska, aleati i së cilës është presidenti serb Aleksandar Vuçiq, bëhet që qëndron prapa sulmit vdekjeprurës.
A nuk e sheh Perëndimi se çfarë po ndodh në pragun e BE-së? A nuk e kuptojnë evropianët se është e lehtë për presidentin rus, Vladimir Putin, që me ndihmën e Serbisë, një vend kandidat për në BE, të nxisë edhe më tej disponimin tashmë shpërthyes në Kosovë, dhe kështu, në skenarin më të keq, të zhysë gjithë Ballkanin Perëndimor përsëri në luftë? Kjo do të ishte një tjetër katastrofë për komunitetin perëndimor krahas luftës në Ukrainë – e cila do të përpëlitej në duart e Moskës.
Është e hidhur të shohësh sesi evropianët – ashtu sikurse në Siri e Libi – po dështojnë strategjikisht në rastin e Kosovës dhe se si politika evropiane ndodhet në fakt në gërmadha. Traktati i supozuar bazë ndërmjet Kosovës dhe Serbisë, i hartuar nën udhëheqjen gjermano-franceze, nuk vlen pesë pare.
Dialogët mes dy palëve të ndërmjetësuar nga Brukseli nuk kanë sjellë asgjë prej vitesh. Miroslav Lajçak, përfaqësuesi special i BE-së për dialogun ndërmjet Beogradit dhe Prishtinës, ka dështuar dhe duhej të ishte tërhequr shumë kohë më parë.
Sa kohë dëshiron Uashingtoni t’i shikojë të gjitha këto? A nuk e njeh edhe presidenti amerikan Joe Biden rrezikun e një zjarri?
Kosova dhe Serbia nuk i besojnë njëra-tjetrës
Nuk ka besim mes qeverive të Kosovës dhe Serbisë. Ky është një problem i madh. Natyrisht, edhe kryeministri i Kosovës, Albin Kurti, ka bërë gabime, për shembull me emërimin e kryetarëve shqiptarë në veri të Kosovës. Por arsyeja e vërtetë e tensioneve janë politikat destruktive të Vuçiqit.
Ishin huliganët kriminelë serbë të futbollit ata që sulmuan dhe plagosën rëndë ushtarët e NATO-s në Kosovë në fillim të verës. Ishte Vuçiq ai që dërgoi ushtrinë e tij në kufirin e Kosovës dhe tërhoqi zyrtarët serbë nga policia e Kosovës.
Frika nga radikalizimi i mëtejshëm në Serbi, por edhe nga një linjë edhe më e ngushtë e përforcuar midis Beogradit dhe Moskës, do të thotë se Perëndimi është shumë i butë me Vuçiqin. Ky është një gabim i madh./FolDrejt/
