Legjenda e politikës shqiptare, që nuk u frikua as në kohën e terrorit më të egër shtetëror në Maqedoninë Veriore, kishte paraqitje mjaft të prekshme, veçanërisht në pjesën kur foli për tmerrin që ka përjetuar bashkëshortja dhe vajza e tij si pasojë e përgjimit.
“I dinin problemet e mia shëndetësore dhe problemet shëndetësore të bashkëshortes sime. Anonim paraqiteshin në telefonin tim në shtëpi, në telefonin e bashkëshortes dhe vajzës sime”, tha Osmani, duke ndërpre dëshminë nga shqetësimi i madh, transmeton Gazeta Lajm.
U krijua heshtje në gjykatë. Ai kërkoi falje që u shqetësua.
“Montuan proces kundër meje ku thonin se shtëpinë e kamë ndërtuar nga posti i kryetarit të komunës. Kërkonin, gjurmonin, akuzonin, por gjithçka ishte e pastër si kristali. Në fund ua dhash letrat për fytyre”, tha Osmani në dëshminë e tij, duke treguar golgotën që ka përjetuar deri sa ia kanë përgjuar bisedat telefonike atij dhe anëtarëve të familjes.
Ai paralajmëroi se dëmin që ka përjetuar dhe që e kanë paguar me shëndet bashkëshortja dhe vajza, do të kërkojë dëmshpërblim.
