Arbër Rexhaj ka reaguar pas publikimit të pjesës së dytë të përgjimit të Shefes së Grupit Parlamentar të Vetëvendosjes, – Mimoza Kusari Lila, shkruan Fol Drejt.
Sipas Rexhajt “episodi i dytë i Berat Buzhalës i ka 22 minuta e 48 sekonda. Prej të cilave në vetëm rreth 25 sekonda dëgjohet Mimoza duke folur edhe atë në shumicën e rasteve duke bërë pyetje.”
Sipas Rexhajt qëllimi i Simiqit ka qenë që t’i bëhet shantazh Mimozës, e pasi ai nuk ka funksionuar, qëllimi është ta diskreditojë figurën e saj.
Ky është postimi i plotë i tij:
Episodi i dytë i Berat Buzhalës i ka 22 minuta e 48 sekonda. Prej të cilave në vetëm rreth 25 sekonda dëgjohet Mimoza duke folur edhe atë në shumicën e rasteve duke bërë pyetje. Pjesa tjetër, Berati duke provuar t’i jep drejtim fjalëve të Slavko Simiqit, që i merr si të vërteta të padiskutueshme.
Ky episod na e bën të qartë që audio-incizimi është bërë nga Slavko Simiq me qëllim që ato t’i përdorë për shantazh. E kur shantazhi nuk ka sukses, ato të publikohen me qëllim diskreditimit. Metodë kjo e njohur e Listës Serbe dhe BIA-s. Fakti që është publikuar audio-incizimi, është dëshmi që shantazhi nuk ka funksionuar. Fakti që janë publikuar te Berati është dëshmi e bashkëpunimit mes tyre.
E vetmja dëshmi që na është prezantuar se Mimoza kinse ka folur me Radojçiqin pesë herë, janë fjalët e Slavkos, i cili qartazi flet në funksion të përgjimit.
Në bisedë, Mimoza praktikisht kërcënohet nga Slavko me idenë se biseda që po e zhvillojnë do të mund të publikohej në media me ç’rast, do t’i thyhej koka, jo vetëm Mimozës, por krejt VETËVENDOSJE-s! (minuta e 5.48 deri 6.04). Mimoza,pra e shpërfillë tërësisht këtë kërcënim.
Berati i vë në shërbim të gjithë audiencën e tij dhe të portalit të tij, Radojçiqit duke ia transmetuar letrën e tij. Pra, ofron hapësirë të madhe mediatike fjalëve të Radojçiqit në të cilin ai e paraqet veten si viktimë dhe subjekt persekutimi.
Në mënyrë të qëllimshme përfshihet pjesa që kinse Radojçiqit thotë se dëmin më të madh ia ka shkaktuar PDK-ja. Haptazi përpjekje për ta ndërruar në publik përshtypjen për raportet e tyre. Pa PDK-në në pushtet, Radojçiqi nuk do të kishte mundësi të jetë i pushtetshëm në veri, e as PDK nuk do të qeveriste prej Prishtinës. Pra duke e kritikuar PDK-në, po i shërben PDK-së.
Në video, Berati e akuzon Mimozën për çka nuk ka thënë, jo për çka ka thënë. Sepse, ajo nuk i është përgjigjur Slavkos sipas preferencave të Beratit./FolDrejt/
