Dje në Këshillin e Kombeve të Bashkuara në Nju Jork, Ministrja e Punëve të Jashtme në Republikën e Kosovës, Donika Gërvalla Schwarz, ka debatuar ashpër me homologun e saj nga Serbia, Ivica Daçiq, shkruan Fol Drejt.
Kjo përplasje është reflektuar sot edhe në shtypin serb, ndërsa raportohet se Ministrja Gërvalla ia ka drejtuar gishtin Daçiqit, duke i thënë se edhe ai nuk është i pa mëkate, kur bëhet fjalë për luftën në Kosovë, dhe se meriton të sillet para gjykatës për këtë punë.
Ministrja Gërvalla ka thënë se presidenti serb Aleksandar Vuçiq ka qenë “ministër i propagandës” i ish-presidentit Sllobodan Millosheviq dhe se ai “ende e kryen atë funksion”.
“Dora e djathtë e kasapit të Ballkanit që është përgjegjës për luftërat ballkanike është personi që sapo foli para nesh. Ky ka shumë gabime në duart e tij. Nuk kishte fjalë keqardhjeje, përkundrazi shfaqte përbuzje për viktimat… Daçiq, tani ministër i Punëve të Jashtme, është përgjegjës për vrasjet masive dhe dhunën dhe duhet të sillet para gjykatës për krimet e luftës”, ka thënë Gërvalla në Nju Jork.
Daçiq është orvatur t’i kundërpërgjigjet Gërvallës pas akuzave të kësaj të fundit, duke e pyetur se pse ai dhe “Aleksandër Vuçiq nuk po gjykohen për krime lufte, por në Hagë janë Hashim Thaçi e Kadri Veseli?”.
Më tutje ai iu është referuar deklaratave të Gërvallës duke thënë se “kur flet për gjenocidin serb ndaj shqiptarëve në Prishtinë në vitet e 90-ta kanë jetuar 40 mijë serbë dhe sot janë rreth 100. Po ta kishin bërë gjenocidin serbët, numri do të ishte përmbysur. Çdo metër tokë e Kosovës është e mbuluar me gjak serb”, tha Daçiq. Megjithatë ai e ka fshehur faktin se një pjesë dërmuese e serbëve të ardhur në Kosovë, ndërsa vendasve shqiptarë po iu mohoheshin të drejtat elementare në mënyrë sistematike, vendi po mbushej me kolonë serbë për të cilët Kasapi i Ballkanit Sllobodan Millosheviq kishte premtuar se do të hanin me lugë prej ari.
Ai shtoi se Serbia dëshiron dialog, por se nuk dëshiron që dikush të mos i përmbushë obligimet e veta dhe të shpërblehet për të, “siç është rasti me Prishtinën” në lidhje me formimin e Asociacionin.
Ministri serb po ashtu ka theksuar se Vuçiq nuk e ka nënshkruar marrëveshjen në Ohër dhe se ka thënë se për Serbinë është e papranueshme çdo njohje faktike apo formale e Kosovës dhe anëtarësim i Kosovës në OKB.
“Pranimi gojor i marrëveshjes nënkupton edhe rezerva verbale për qëndrime të caktuara. Plus, kushti i parë për zbatimin e gjithçkaje tjetër (nga marrëveshja) është formimi i Asociacionit. Do të shohim se çfarë do të ndodhë më 2 maj në Bruksel (në raundin e ardhshëm të dialogut). Ju nuk doni paqe, jeni plot urrejtje, doni luftë, por ne nuk kemi frikë nga ju. Komuniteti ndërkombëtar duhet të ketë frikë nga ju”, citohet të ketë thënë Daçiq.
Pasi Daçiq iu përgjigj Gervallës, ajo i tha Daçiqit se e kuptonte pse ishte i zemëruar dhe se e dinte pse ai përdorte gjuhën e viteve 1990.
“Vetëm sot treguat pse njerëzit në Serbi në vitet e 90-ta ju quanin “Sloba e vogël”, “Millosheviq i vogël”, për shkak të idhullit tuaj. E kuptoj që jeni inatosur, e di gjuhën e asaj kohe”, ka thënë ajo.
Ajo shtoi se është e vështirë që “ai dhe të tillët” t’u shpjegojnë qytetarëve të tyre se e kanë humbur Kosovën në vitin 1999 dhe “duhet ta mbani një retorikë të tillë”, tha Gërvalla.
Pasi Daçiq ia përmendi babain, ajo tha se vrasja e tij në vitin 1982, si shkrimtar dhe gazetar që përdorte metoda jo të dhunshme për pavarësinë e Kosovës, ishte përgjegjësi e UDBA-së, e cila, siç tha ajo, kontrollohej nga shteti i Serbisë./FolDrejt/
