Tenisti i njohur serb Novak Djokoviq ka shprehur dëshirën që të vijë në Kosovë, në mënyrë që t’i pagëzojë fëmijët e tij, transmeton Fol Drejt.
Në një intervistë për italianen “Corriera della Sera”, Djokoviq ka thënë se dëshiron të kthehet me gruan Jelenan, “për t’i pagëzuar fëmijët tanë, Stefanin tash 8-vjeçar dhe Tarën 5-vjeçare. E di që tema është shumë e ndjeshme. Konflikti është ende aty, jo me armë për momentin, por ndihet tensioni. Nuk dua të përfshihem në politikë, por për çdo serb, Kosova është zemra, është qendra e kulturës, e identitetit tonë, e traditës, e fesë sonë”, ka thënë ai.
Por një postim i ministrit Hajrullah Çeku, ka zgjuar një valë reagimesh në opinionin publik në Kosovë e Serbi, ndonëse ai në mënyrë direkte nuk e ka apostrofuar Djokoviq-in.
Ministri i Kulturës, Çeku, në një postim në llogarinë e tij në Twitter ka shkruar:
“Pa vaksina, nuk lejohet hyrja”, ndërsa ka shpërndarë një artikull ku flitet dëshirën e shprehur të Djokoviqit, për Della Seran.
Për këtë ka reaguar edhe Dioqeza Ortodok e Rashkës dhe Prizrenit, duke e cilësuar postimin e Çekut si “pikëlluese”:
“Dioqeza e Rashkës dhe e Prizrenit është thellësisht e pikëlluar nga postimi i fundit i ministrit të Kulturës dhe Sportit të Kosovës, z. Çeku, i cili thotë se tenisti më i mirë në botë, Novak Djokoviq, nuk mund të vijë ligjërisht në Kosovë sepse nuk ka pranuar të vaksinohet kundër Covid”.
Për më shumë në deklaratë vihet në pikëpyetje mesazhi që përçon autoriteti i ministrit, si një zyrtar i lartë i Qeverisë së Kosovës, ndërsa sipas dioqezës keqkuptohet intervista e Djokoviqit:
“Pyesim veten se çfarë mesazhi për paqen dhe mirëkuptimin në Kosovë dërgon një zyrtar i qeverisë së Kosovës dhe ministrja e Kulturës dhe Sportit, me një koment të papërshtatshëm në rrjetet sociale duke keqinterpretuar deklaratën e Novak Gjokoviqit i cili në intervistën e tij për Corriere della Sera tha: “Nuk dua të merrem me politikë, por për çdo serb, Kosova është zemra, është qendra e kulturës, e identitetit, e traditës, e besimit tonë”. Këtë deklaratë ai e ka bërë në kuadër të dëshirës së shprehur publikisht për t’i pagëzuar fëmijët e tij në Kosovë” – thuhet në deklaratën e dioqezës, e cila përfundon që kjo çështje të zgjidhet në llogari të lirisë së lëvizjes së lirë.
Krah dëshirës së Vuçiqit është rreshtuar edhe publicisti Veton Surroi.
“Çdokush ka të drejtë t’i pagëzojë fëmijët e tij/saj në kishat e Kosovës. Është e drejta e Djokoviqit që të zgjedh kur dhe ku. Le të ndihet në pagëzimin e fëmijëve të tij fryma e Mateut 22:39: “Duaje të afërmin tënd si veten tënde”” – shkruan Surroi në një postim në llogarinë e tij në Twitter.
Ua kujtojmë se Djokoviq në intervistë nuk thotë se ka vendosur për datën dhe vendin, por kjo nuk i ka frenuar reagimet për deklaratën e tij./FolDrejt/
