Kryeministri i Republikës së Kosovës, Albin Kurti, bashkë me ministren e Arsimit, Shkencës, Teknologjisë dhe Inovacionit, Arbërie Nagavci dhe Kryesuesin e Komisionit Qeveritar për Personat e Zhdukur, Andin Hoti, sot mori pjesë në përurimin e Shkollës së re Fillore dhe të Mesme të Ulët “Bajram Curri”, në Krushë të Madhe, e që përkon me Ditën e shkollës, transmeton Fol Drejt.
Duke e konsideruar këtë si festë të dyfishtë, kryeministri Kurti tha se në Krushën e Madhe, të dhembjes së madhe, sot po na bashkon gëzimi. Fëmijët e lindur në liri, po festojnë të lirë.
“Kjo shkollë e mban emrin e një atdhetari tonë të madh, të lindur këtu, në Krushë të Madhe, pra Bajram Currit, të cilit në vitin që shkoi e kishim 160-vjetorin e lindjes. Si veprimtar i çështjes sonë kombëtare që u angazhua edhe për shkollën shqipe, duke ndihmuar për themelimin e klubeve e shkollave shqipe në Kosovë dhe duke mbrojtur alfabetin e gjuhës shqipe të vendosur në Kongresin e Manastirit. E sot, bashkë po përurojmë një shkollë të re në vendlindjen e tij të dashur për të gjithë neve”, tha kryeministri Kurti.
Para të pranishmëve, ai u shpreh se është i nderuar të ndaj me ta lumturinë e hapjes së shkollës së re, që është edhe një dëshmi e vendosmërisë së tyre të palëkundur, për të rindërtuar jetën, për të ndërtuar një të ardhme më të ndritur për të vegjlit e të rinjtë e Krushës së Madhe. Në këtë vend që pa shumë shkatërrim, sot po hapim dyert e një ndërtese të re shkollore.
Ai vlerësoi se arsimi cilësor është baza më e qëndrueshme për prosperitet për të ardhmen, dhe se për ta ngritur cilësinë dhe për të përmirësuar kushtet arsimore, e kemi rritur buxhetin e arsimit edhe në këtë vit. Tanimë, siç shtoi ai, janë siguruar 18 milionë euro për investime fillestare për vitet e ardhshme në teknologjinë e informacionit dhe komunikimit në infrastrukturën përkatëse në shkolla.
Më tej, kryeministri Kurti tha se me Strategjinë e Arsimit për periudhën 2022-2026, e cila është miratuar në Qeveri parashihen investime domethënëse në fushën e edukimit në fëmijërinë e hershme dhe teknologji të informacionit e të komunikimit.
“Qeveria e Republikës së Kosovës po punon me një qasje shumëdimensionale për ta forcuar shtetin, duke forcuar arsimin”, tha kryeministri.
Objekti i ri i shkollës ka një sipërfaqe prej rreth 5000 m², me 23 klasa mësimi, 2 dhoma për parafillor me hyrje të veçantë, laboratorin, bibliotekën, dhomat e leximit dhe klasa e informatikës, të pajisura me inventar bashkëkohor.
Fjala e plotë e kryeministrit Kurti:
Mirë se ju gjej këtu në Krushën e Madhe në një ditë të bukur me diell për një ngjarje tejet të rëndësishme për brezin aktual të fëmijëve, të prindërve, por edhe për ata të cilët do të vijnë pas nesh. Në këtë vend që është i madh jo vetëm pse e ka emrin e tillë, por për shkak se e ka kontributin e tillë, e ku natyrisht që duhet veçuar dy personalitete të shquara të çështjes sonë kombëtare, Bajram Currin e Ukshin Hotin.
E nderuara Ministre e Arsimit, Shkencës, Teknologjisë dhe Inovacionit, znj. Arbërie Nagavci,
I nderuari Kryetar i Komunës së Rahovecit, z. Smajl Latifi,
I nderuari drejtor i shkollës, Rrezart Veseli,
I dashuri Andin Hoti,
I nderuari Selami Hoti, kryetar i fshatit Krushë e Madhe dhe të nderuar drejtorë të Komunës,
Asamblistë të Kuvendit Komunal,
Motra, vëllezër,
Zonja dhe zotërinj
Mësimdhënës e prindër
Të dashur nxënës,
Shumë të dashur banorë të Krushës së Madhe,
Mirë se ju gjej edhe njëherë në këtë festë të dyfishtë. Në festën e Ditës së Shkollës dhe të përurimit të shkollës së re në Krushën e Madhe të dhembjes së madhe, sot po na bashkon gëzimi. Fëmijët e lindur në liri, po festojnë të lirë.
Kjo shkollë e mban emrin e një atdhetari tonë të madh, të lindur këtu, në Krushë të Madhe, pra Bajram Currit, të cilit në vitin që shkoi e kishim 160-vjetorin e lindjes. Si veprimtar i çështjes sonë kombëtare që u angazhua edhe për shkollën shqipe, duke ndihmuar për themelimin e klubeve e shkollave shqipe në Kosovë dhe duke mbrojtur alfabetin e gjuhës shqipe të vendosur në Kongresin e Manastirit. E sot, bashkë po përurojmë një shkollë të re në vendlindjen e tij të dashur për të gjithë neve.
Unë jam shumë i nderuar që ndaj me ju lumturinë e hapjes së kësaj shkolle të re, që është edhe një dëshmi e vendosmërisë suaj të palëkundur, për ta rindërtuar jetën, për ta ndërtuar një të ardhme më të ndritur për të vegjlit e të rinjtë e Krushës së Madhe. Në këtë vend i cili ka pa shumë shkatërrim e shumë vuajtje ka përjetuar në të gjitha epokat sot po hapim dyert e një ndërtese të re shkollore.
Në këtë objekt të ri, me sipërfaqe prej rreth 5000 m², ju presin 23 klasa mësimi, 2 dhoma për parafillor me hyrje të veçantë, laboratori, biblioteka, dhoma e leximit dhe klasa e informatikës, të pajisura me inventar bashkëkohor. Tani këto klasa presin të mbushen me fëmijë, me kureshtjen për dituri, zellin për punë dhe ëndrrat për të ardhmen.
Brenda këtyre mureve mësuesit do t’i udhëheqin dhe frymëzojnë nxënësit në rrugën e dijes dhe të të kuptuarit, duke përforcuar vlerat e të mësuarit, respektit dhe solidaritetit. Duhet kultivuar një mjedis ku inkurajohet kreativiteti dhe nxitet mendimi kritik. Fëmijët, teksa mësojnë dhe zgjerojnë mendjet e tyre, do të mësojnë edhe vlerën e punës së përbashkët dhe frymës së bashkimit që shtrihet përtej dyerve të shkollës.
Bukuria nuk qëndron vetëm në strukturat fizike dhe në arkitekturën e kësaj shkolle që po e shohim këtu, por edhe në ndikimin e thellë që ky institucion do të ketë në jetën e fëmijëve të fshatit dhe më gjerë. Shkollimi shtron rrugë të mundësive të pafundme, për zhvillim individual, formësimin e së ardhmes personale por edhe asaj të përbashkët, duke kontribuar në komunitet e shoqëri. Andaj dita e sotme është festë për fuqinë e arsimit për të transformuar jetët dhe për të hedhur themelet për një të ardhme të begatë.
Andaj le ta vlerësojmë këtë çast pikëtakim të së bukurës me përparimin, privilegjit me përgjegjësinë e pamasë për të siguruar që kjo shkollë të jetë e suksesshme, që nxënësit e saj të edukohen e të arsimohen, në mënyrë që t ‘i realizojnë ëndrrat e tyre.
Fuqia transformuese e arsimit është e pamatshme dhe është detyra jonë, përgjegjësia jonë, të sigurojmë që çdo fëmijë të ketë arsimim cilësor. Arsimi cilësor është baza më e qëndrueshme për prosperitet për të ardhmen. Për ta ngritur cilësinë dhe për të përmirësuar kushtet arsimore, e kemi rritur buxhetin e arsimit edhe në këtë vit. Tanimë kemi siguruar 18 milionë euro për investime fillestare për vitet e ardhshme në teknologjinë e informacionit dhe komunikimit në infrastrukturën përkatëse në shkolla.
Me Strategjinë e Arsimit për periudhën 2022-2026, të cilën e kemi miratuar në Qeveri parashihen investime domethënëse në fushën e edukimit në fëmijërinë e hershme dhe teknologji të informacionit e të komunikimit. Sepse jo vetëm për edukimin dhe personalitetin por edhe për arsimimin dhe profesionin e ardhshëm, fëmijëria e hershme, edukimi i hershëm në fëmijërinë e hershme është vendimtare .
Qeveria e Republikës së Kosovës po punon me një qasje shumëdimensionale për ta forcuar shtetin, duke forcuar arsimin.
Nxënës të dashur, të nderuar të pranishëm,
Arsimi është përpjekje kolektive që kërkon përfshirjen aktive të prindërve, komunitetit dhe qeverisë. Të angazhohemi bashkë, që me sistemin tonë arsimor, me shkollat tona, të rrisim qytetarë të ditur dhe breza që teksa rriten vetë e lartësojnë edhe Republikën e Kosovës.
Pra le të punojmë e le të mësojmë, le të arsimojmë e le të edukojmë ashtu qysh gjithmonë kanë qenë idealet e dëshmorëve dhe martirëve të kombit e ashtu sic janë ëndrrat e fëmijëve tanë.
Gëzuar Dita e shkollës!
E gëzofshi shkollën e re! Qoftë vend i sukseseve dhe i arritjeve të shumta të përbashkëta.
Ju falemnderit./FolDrejt/
