Pesë civilë janë vrarë nga sulmuesit e armatosur që sulmuan dy fshatra në Kenia juglindore, tha policia.
Sulmi të dielën ndodhi në fshatrat Juhudi dhe Salama në kontenë Lamu, që kufizohet me Somalinë, tha burimi policor.
Sulmuesit dogjën gjithashtu shtëpi dhe shkatërruan prona.
Një burrë 60-vjeçar u lidh me litar dhe “i prenë fytin, i ishte djegur shtëpia me të gjitha sendet”, tha policia. Tre të tjerë u vranë në mënyrë të ngjashme, ndërsa një viktimë e pestë u qëllua.
Banori Hassan Abdul tha se “gratë u mbyllën në shtëpi dhe burrat u urdhëruan të dilnin, ku i lidhnin me litarë dhe i therën”.
Një nxënës i shkollës së mesme ishte në mesin e pesë personave të vrarë, tha Abdul, duke shtuar se “të gjithë të vrarët u prenë dhe disa prej tyre u prenë koka”.
Një tjetër banor vendas, Ismail Hussein, tha se luftëtarët vodhën furnizime ushqimore para se të largoheshin, duke qëlluar me armë në ajër.
Policia e përshkroi incidentin si një “sulm terrorist”, një frazë që ata zakonisht përdorin për t’iu referuar inkursioneve të grupit al-Shabab të Somalisë.
Lamu është afër kufirit të Kenisë me Somalinë dhe luftëtarët nga al-Shabab shpesh kryejnë sulme në zonë në një përpjekje për ta shtyrë Kenian të tërheqë trupat nga Somalia, ku ata janë pjesë e një force paqeruajtëse ndërkombëtare që mbron qeverinë qendrore.
Kenia dërgoi për herë të parë trupa në Somali në vitin 2011 për të luftuar grupin e lidhur me al-Kaedën dhe tani është një kontribues i madh i trupave në një operacion ushtarak të Bashkimit Afrikan (AU) kundër grupit. /FolDrejt/
