Zëdhënësi i Kremlinit Dmitry Peskov tha më 11 nëntor se Rusia vazhdon ta konsiderojë Khersonin territor të saj, pavarësisht tërheqjes së trupave ruse nga qyteti, sipas agjencisë ruse të lajmeve që kontrollohet nga shteti TASS, raporton The Kyiv Independent, përcjell Fol Drejt.
Peskov nuk e komentoi vendimin e udhëheqësve ushtarak rusë për t’u larguar nga Khersoni.
Forcat ruse janë tërhequr plotësisht nga bregu perëndimor i lumit Dnipro, ku ndodhet qyteti Kherson, sipas Ministrisë ruse të Mbrojtjes. Ministri Sergei Shoigu urdhëroi tërheqjen më 9 nëntor.
Forcat e Armatosura të Ukrainës hynë në qytetin Kherson më 11 nëntor, sipas Drejtorisë së Inteligjencës të Ministrisë së Mbrojtjes.
“Kherson kthehet në Ukrainë, ndërsa Forcat e Armatosura hyjnë në qytet”, thuhet në deklaratën e saj. “Rrugët e tërheqjes janë nën kontrollin e ushtrisë ukrainase. Çdo ushtar rus që reziston do të shkatërrohet.”
Më 30 shtator, diktatori Vladimir Putin tha se Rusia po aneksonte rajonet Kherson, Zaporizhzhia, Donetsk dhe Luhansk të Ukrainës. Në atë kohë, Putin tha se Rusia do të “mbronte” territoret e katër rajoneve që pretendonte kundër forcave ukrainase “me të gjitha mjetet në dispozicion”.
Qyteti i Khersonit në Ukrainën jugore u pushtua nga forcat ruse në mars, menjëherë pas fillimit të pushtimit të plotë në shkurt. /FolDrejt/
