Drejtori i Zyrës për Kosovën, Petar Petkoviq, tha për RTS-në se Albin Kurti po tenton të provokojë luftë sepse vetëm kështu mund t’i shmangë obligimet e marra me nënshkrimin e Marrëveshjes së Brukselit, gjegjësisht formimin e Unionit të komunave serbe, raporton Danas, përcjell Fol Drejt.
Përveç provokimit për luftë nga Kurti, ai po ashtu tha se gjatë trazirave të djeshme janë lënduar 52 persona të nacionalitetit serb, si dhe 41 pjesëtarë të KFOR-it. Drejtori i Zyrës për Kosovë tha: Nuk do të lejojmë dëbimin e popullit tonë.
Petar Petkoviq, mysafir në Dnevnik të RTS-së, tha se dje Albin Kurti ka dashur t’i vë zjarrin jo vetëm veriut të Kosovës, por edhe të gjithë rajonit dhe si pasojë janë lënduar 52 persona nga pala serbe dhe 41 pjesëtarë të KFOR-it u plagosën.
“Kur i shikon të gjitha veprimet e tij, gjatë fundjavës dhe të premtes – prezantimin e dhunshëm të kryetarëve të rremë në katër komuna, të gjithë e kishin të qartë se ai dëshiron që konfliktet, trazirat në Kosovë, të shkaktojnë luftë, sepse kjo është e vetmja mënyrë për të shmangur formimin e ZSO-së”, tha Petkoviq.
Ai theksoi se serbët kanë pasur garanci nga KFOR-i se nuk do të lejojnë hyrjen e “kryetarëve të komunave okupuese dhe në ndërtesën e administratës komunale serbe”, por se kanë rezultuar se ata realisht kanë ndihmuar kryetarët shqiptarë.
Ai theksoi se protesta e serbëve ka qenë paqësore dhe se trazirat nuk do të ndodhnin nëse KFOR-i nuk do të kishte nisur me forcë t’i lëvizte serbët për të arritur te dy autoblinda me forcat speciale të Policisë së Kosovës.
“Nuk do të kishte ardhur deri këtu nëse KFOR-i nuk do të kishte përdorur forcë dhe nuk do të kishte hedhur gaz lotsjellës, njerëzit po iknin, njerëzit do të ishin duarbosh”. “Ne nuk kemi nevojë të përplasemi me NATO-n, por mandati i KFOR-it është të mbrojë popullin serb”, theksoi Petkoviq.
Ai tha se ne nuk do të lejojmë dëbimin e popullit tonë dhe se ushtria serbe do ta mbrojë popullin e saj.
Kurti është dikush që dëshiron të paraqitet si një Zelenski i vogël, por në fakt ai është një Hitler i vogël që dëshiron të dëbojë popullin serb dhe të qëllojë mbi popullin serb, shteti i Serbisë nuk do ta lejojë atë”, përfundoi Petkoviq. /FolDrejt/
