Sipas Danas, bashkëshortja e njërit prej serbëve të Kosovës, e quajtur Jelena Zhivkoviq, ka mohuar pohimet e drejtorit të Zyrës për Kosovë, Petar Petkoviq, se policia e Kosovës “ është ngutur për të arrestuar” burrin e saj dhe dy serbë të tjerë në pjesën veriore të Kosovës. Ajo me këtë rast i ka bërë thirrje Beogradit që t’i ndalojë etiketimet dhe sharjet, duke i cilësuar ato si të dëmshme për vet serbët, transmeton Fol Drejt.
“Burri im është shok i Milun Milenkoviqit, kanë themeluar një klub bashkë, janë trajnuar, por nuk është e vërtetë që atë e kanë ndjekur për ta arrestuar, siç ka thënë drejtoria e Zyrës për Kosovë”, ka thënë ajo për portalin N1info.
Kujtojmë se Milenkoviq u arrestua më 13 qershor në një operacion të njësisë speciale të Policisë së Kosovës në pjesën veriore të Mitrovicës me akuzën e pjesëmarrjes në incidentin para zyrës së Komisionit Komunal të Zgjedhjeve në pjesën veriore të Mitrovicës, si dhe në ngjarjet e 29 majit në Zveçan.
Bashkëbiseduesja e N1info ka thënë se askush nga Beogradi nuk i ka kontaktuar me këtë rast dhe se do të dëshironte të dinte se nga i kanë marrë këto informata ata nga (e ashtuquajtura), Zyra për Kosovën.
Siç ka thënë ajo, situata nuk është e sigurt, andaj etiketimet nga Beogradi për serbët që jetojnë në veri të Kosovës, nuk janë aspak të mira.
I ashtuquajturi drejtor i Zyrës për Kosovën, Petkoviq, ka thënë se më 16 qershor, në orët e vona të natës Mitrovica ka qenë një gjendje shtetrrethimi. Sipas tij, “policia e Albin Kurtit ka tentuar të arrestonin dy vëllezër, por më pas ndoqi shokun e Lunetit, dhe kjo zgjati gjithë natën”.
Të gjitha këto pretendime, sipas vetë bashkëshortes së të arrestuarit, janë të pavërteta./FolDrejt/
