Drejtori i të ashtuquajturës Zyra për Kosovën Petar Petkoviq, ka bërë të ditur se mandati i Ekipit Menaxhues për hartimin e Statutit të Asociacionit zgjat deri në përfundimin e procesit të formimit të Komunitetit dhe nuk ka bazë ligjore që Kryeministri Albin Kurti në mënyrë të njëanshme dhe arbitrare ta shkarkojë këtë organ, shkruajnë mediat serbe, transmeton Fol Drejt.
“Fakti që nuk i pëlqen drafti i Statutit të Asociacionit, është problem i tij personal, sepse mandati i Ekipit Menaxhues ekzistues është aktiv dhe i vlefshëm është konfirmuar në disa raste nga përfaqësuesit e Bashkimit Evropian (BE), si dhe Përfaqësuesi i Lartë i BE-së për Politikë të Jashtme, Josep Borrel”, ka thënë së fundmi Petkoviq në komunikatën për media, ku e komenton rastin e shkarkimit të këtij ekipi, nga Qeveria e Kosovës.
Sipas Petkoviq “para se Kurti të sfidojë funksionimin e Ekipit Menaxhues, duhet ta rilexojë deklaratën e zëdhënësit të BE-së Peter Stano, se Ekipi Menaxhues nuk mund të zëvendësohet në mënyrë të njëanshme, sepse ata janë pjesë e procesit të dialogut dhe se përbërja e atij ekipi është ende e vlefshme për ta.”
“Po ashtu, përfaqësuesi i lartë i BE-së Borrell në fjalimin e tij pas raundit të fundit të dialogut më 2 maj theksoi se BE-ja do të vazhdojë nëse është e nevojshme të ftojë Ekipin Menaxhues në takimet në Bruksel. Përpjekja e Kurtit për të sfiduar përbërjen dhe mandatin e Ekipit Menaxhues nuk është gjë tjetër veçse blerja e pafrytshme e kohës, ai nuk do t’i shmangej detyrimit për formimin e Asociacionit, por nuk do të mund ta bëjë këtë” – citohet të ketë thënë Petkoviq.
Sipas tij, e vetmja gjë të cilën është duke e bërë Kryeministri Kurti është synimi për “prishjen e dialogut” dhe shmangien e detyrimit për formimin e Asociacionit të Komunave me Shumicë Serbe. Ç’është e vërteta, Kryeministri Kurti tashmë është deklaruar hapur për formimin e tij, por ka theksuar se Qeveria e Kosovës nuk do ta lejojë që ky mekanizëm politik, të bie ndesh me parimet kushtetuese të republikës./FolDrejt/
