Sot në Kanionin e Holtës në Gramsh banorët e zonës u mblodhën në një dëgjesë me ministren e re të Infrastrukturës dhe Energjetikës, Belinda Balluku, dhe ministrin e Turizmit dhe Mjedisit, Blendi Klosi.
Shqetësimi i banorëve ishte ndërtimi i një hidrocentrali në kanionin e Holtës, që është një atraksion turistik në Shqipëri. Por dy ministrat qetësuan banorët duke u thënë se nuk do të ketë asnjë projekt që do të prekë interesin publik.
“Këtu janë pezulluar punimet. Kam marr vendimin për pezullimin e të gjitha aktivitetet e HEC-eve që janë licencuar apo që janë në proces licencimi për të bërë një skanim të statusit të tyre juridik, nëse kanë përputhshmëri ligjore dhe kontraktuale. Pra kontratat që janë firmosur nëse i janë përmbajtur subjektet këtyre kontratave qoftë nga ana e afateve apo kushteve, por kemi edhe një kriter shumë të rëndësishëm që është përputhshmëria me impaktin mjedisor që ata krijojnë”, u tha ministrja Balluku banorëve.
Ndërsa ministri i Mjedisit dhe Turizmit, Blendi Klosi u kërkoi ndjesë banorëve për ata që janë shqetësuar për zhvillimet në këtë kanion.
