Sot po mbahet pjesa e dytë të Testit të Arritshmërisë në 176 qendra të testimit, ku më shumë se 24 mijë nxënës të klasave të nënta po i nështrohen një vlerësimi që përcakton vendin e tyre në shkollimin e mëpastajmë.
Por, pothuajse si çdo herë tjetër, edhe kësaj radhe kanë nisur të shpërndahen testet me përgjigjet e sakta në rrjete sociale.
Në grupin “Testi i arritshmërisë 2022” në Facebook, i cili numëron qindra anëtarë dhe është publik, janë shpërndarë përgjigjet e grupit D.
Testi ka nisur në orën 10:00 dhe do të përfundojë në 12:00.
Ministria e Arsimit, Shkencës, Teknologjisë dhe Inovacionit ka njoftuar se në këtë pjesë të dytë, nxënësit do po iu nënshtrohen pyetjeve nga lëndët matematikë, informatikë, shkenca natyrore, fizikë dhe kimi.
Pjesa e parë e testimit është mbajtur më 4 qershor 2022 dhe MASHTI ka njoftuar se nxënësit që kanë përdorur telefona, nuk do t’u lejohet të përsërisin pjesën e parë të testimit dhe atyre do t’iu llogariten pikët vetëm nga lëndët në pjesën e dytë të testit. Ndërsa, ndaj gjashtë administratorëve që kanë shpërfillur rregullat gjatë pjesës së parë të testit, janë ndërmarrë masa.
“Ndaj gjashtë administratorëve që i kemi vërtetuar që nuk i kanë përfillur rregullat janë ndërmarrë masat, kurse rrjetet sociale sigurisht që duhet të vërtetohen dhe hetohen. Sipas nxënësve, ka edhe mësimdhënës që kanë hyrë në këto rrjete sociale, sigurisht se ata do të identifikohen dhe do të ndërmerren masa ndaj tyre”, ka thënë Fatmir Elezi, drejtor në Divizionin për Vlerësim, Standarde dhe Monitorim i MASHTI-t./FolDrejt/
