Kuvendi i Komunës së Podujevës ka mbajtur sot mbledhje të jashtëzakonshme, në të cilën ka miratuar ndarjen e mjeteve buxhetore për pako ushqimore dhe higjienike për familjet në asistencë sociale dhe në nevojë.
Kwtw mbledhje, e udhëhoqi kryesuesi Hilmi Hoxha, e ku ishte e pranishme nënkryetarja Marigona Lahu dhe drejtorët e drejtorive të Komunës.
Fillimisht asamblisti Qëndrim Softolli, nga radhët e LDK-së, njëherit iniciuesi i kësaj seance të jashtëzakonshme prezantoi projekt propozimin për ndarjen e mjeteve buxhetore për pako ushqimore dhe higjenike për familjet në asistencë sociale dhe në nevojë, duke e arsyetuar me gjendjen e rënduar ekonomike dhe ngritjen e çmimeve të produkteve elementare.
Propozimi i pikës në fjalë parimisht u përkrah nga të gjithë anëtarët dhe subjektet politike në kuvend komunal. Gjatë seancës diskutabile dhe e pa përcaktuar ishte se nga cila kategori subvencionesh apo nga cili kod buxhetor të merren mjetet për të ndarë këtë ndihmë për familjet në nevojë.
Drejtori i drejtorisë për Buxhet dhe Financa, Fatlum Osmani tha se e përkrahim këtë nismë por propozimi i bërë nga grupi i asamblistëve të LDK-së dhe disa asamblistëve të tjerë duhet të jetë i plotësuar dhe i konkretizuar.
Pas diskutimeve të anëtarëve komunal me drejtorë të drejtorive erdhën në përfundim që kuvendi komunal të ndajë 70 mijë euro për familjet në asistencë sociale dhe në nevojë, ku si e tillë u miratua dhe votua me unanimitet.
Me kërkesën e inicuesit Qëndrim Softolli, kuvendi përzgjodhi edhe 5 anëtarë të komisionit duke përfshirë të gjitha subjektet politike, për mbikëqyrjen e procesit dhe hartimit të raportit për ndarjen e këtyre mjeteve. Anëtarët të cilët u propozuan dhe u miratuan për komision; Edona Shabani (LDK), Ardi Hasani (LVV), Enditë Murati (PDK), Burim Hasani (AAK) dhe Gazmendi Islami (BKD).
