Policia e Kosovës ka vazhduar operacionin e saj të kërkimit të armëve dhe personave të involvuar në sulmin terrorist të 24 shtatorit, të dielën që e lamë pas, shkruan Fol Drejt.
Sipas një njoftimi zyrtar të bërë publik së fundi, policia është duke i kontrolluar edhe pronat e Milan Radojçiqit, zëvendëskryetarit të Listës Serbe, i cili u identifikua në mesin e sulmuesve.
Sipas Telegrafit, Njësia Speciale e Policisë së Kosovës së bashku me EULEX-in dhe KFOR-in janë në rrugën ku ndodhet restoranti Grey, që raportohet se është i gruas së Milan Radoiçiqit.
“Sot, me datën 29.09.2023 Policia e Kosovës është duke zbatuar urdhëresën e gjykatës kompetente për kontrolle, në pesë lokacione në tri komunat në veri të Kosovës. Këto operacione janë duke u zhvilluar lidhur me ngjarjet e fundit të ndodhura në fshatin Banjskë.
Operacioni policor është duke vazhduar nga njësitet relevante të Policisë së Kosovës, me prezencën në vend ngjarje të Prokurorit (të PSRK-së). Me këtë rast Policia e Kosovës njofton qytetarët se nuk kanë nevojë për ndonjë shqetësim” – thuhet në njoftimin zyrtar.
Policia bënë të ditur se këto urdhër kontrolle, janë duke u zbatuar në koordinim me EULEX dhe KFOR./FolDrejt/
