Policia e Kosovës ka dhënë detaje nga rasti në fshatin Smirë të Vitisë, ku një polic u lëndua gjatë parandalimit të një rasti të kontrabandimit të mallrave.
Policia njofton se në bashkëpunim me Doganën e Kosovës si rezultat i kryerjes së detyrave dhe autorizimeve zyrtare kanë arritur që të identifikojnë dhe parandalojnë kryerjen e një rasti të kontrabandimit të mallrave nga tre persona të dyshuar të përfshirë në rast.
Më tej, në komunikatë thuhet se pas përpjekjes së zyrtarëve policor për ta ndaluar veturën e dytë të dyshuar, e njëjta duke i rrezikuar seriozisht zyrtarët policorë dhe doganorë ka goditur veturën zyrtare.
Zyrtarët policorë gjatë legjitimimit të të dyshuarve, janë kanosur nga njëri prej tyre, dhe gjatë futjes në kontroll të një personi të dyshuar, një zyrtar policor ishte sulmuar, dhe ka pësuar lëndime trupore për të cilat i njëjti ka pranuar tretman mjekësor.
