Lëvizja e Listës Serbe, listë politike kjo e instrumentalizuar totalisht nga Beogradi, ishte e pritur dhe paralajmëruar nga mendjet e zgjuara.
Nga Korab Blakaj
Politika serbe e zënë “në kurth” nga tërësia e rrethanave politike që po ndodhnin, patjetër që do ta përdorte instrumentin e saj, për të shkaktuar një situatë gjoja emergjente, dhe në emër të saj për t’u larguar nga bisedimet ku temat kryesore ishin: rregullimi i marrëdhënieve dhe njohja e ndërsjellë me Kosovën!
Duke parë që “laku” i zvarritjes së pafund me bisedime koti po mbyllej, ajo ngrehu kurth të mirëmenduar për Kosovën dhe për “bashkësinë evropiane” e cila dihet botërisht, madje historikisht, që është një aleate e Serbisë në raport me etnikumin shqiptar!
Kurthi presupozon të largojë nga tavolina dialogun për njohje dhe të vë në tavolinë një dialog me Kosovën për “emergjencën” e quajtur “kthim i serbëve në institucione”.
Kosova nuk ka pse humb fokusin! Oportunitetet e shfaqura, ( pasojë e udhëheqjes sonë të zgjuar) duhet t’i kapitalizojmë maksimalisht! Largimi i serbëve nga institucionet e Kosovës i mundëson të forcojë argumentet e saj se integrimi i tyre është farsë (ata janë gjithmonë kolonë e pestë serbe brenda institucioneve tona).
Për rrjedhojë edhe se pushteti artificial i ulëseve të rezervuara, i siguruar me Dokumentin e Ahtisarit në kundërshtim me parimin demokratik të votës, shfrytëzohet vetëm për shkaqe destruktiviteti dhe sabotimi. Prandaj, ky dokument duhet urgjentisht të pushojë se funksionuari dhe është një argument shtesë se krijimi i Zajednicës do të shfrytëzohet për më shumë destruktivitet dhe destabilizim, me synim krijimin e klimës politike dhe rrethanave në teren për ta shkëputur veriun e Kosovës!
Ajo që nuk kuptohet lehtë në mendjen tonë është “afria” amerikane me Evropën për Kosovën.
Pse po ndodh kjo? Kësaj pyetje duhet t‘i japim përgjigje me analiza shkencore! Mendimi im është se amerikanët vlerësojnë deri diku drejtë fuqinë tonë mbrojtëse!
Kosova ka përpara saj detyrën historike të kompromisit politik brendashqiptar për JO-në përfundimtare ndaj Zajednicës, dhe më këtë përgjigje t’u shkojë në tryezë Serbisë dhe evropianëve proserb, por edhe miqve tanë të hutuar amerikanë!
Kosova ka po ashtu një aset të paçmuar të cilin duhet urgjentisht të bëjë funksional politikisht: Elementin shqiptar në Luginë, dhe të fillojë me urgjencë Thellimin Strategjik në Sanxhak.
Në planin e brendshëm, të punohet me urgjencë kombëtare në rritjen e kapaciteteve luftarake të popullit shqiptar!
Në fund të fundit, forca fizike është drejtësia dhe rezultati përfundimtar i çdo dialogimi!
