Presidenti polak Andrzej Duda ka thënë se Polonia do të dërgojë një kompani të tankeve kryesore luftarake Leopard të prodhimit gjerman në Ukrainë, transmeton Ukrinform, përcjell Fol Drejt.
“Një kompani tankesh Leopard do të transferohet si pjesë e krijimit të një koalicioni. Por për këtë është e nevojshme të plotësohen një sërë kërkesash formale, miratime e kështu me radhë. Megjithatë, para së gjithash duam që të jetë një koalicion ndërkombëtar”, tha Duda në një konferencë shtypi në Lviv të mërkurën pas samitit të dytë të Trekëndëshit të Lublinit.
Ai tha se si pjesë e këtij koalicioni ndërkombëtar, Polonia vendosi të sigurojë “paketën e parë të tankeve – një kompani tankesh Leopard”. Ai shprehu shpresën se Ukraina së shpejti do të ketë kompani të tankeve Leopard dhe llojeve të tjera nga partnerë të tjerë ndërkombëtarë për të forcuar mbrojtjen e vendit.
“Një vendim i tillë është marrë tashmë në Poloni”, tha Duda.
Udhëheqësi polak shtoi gjithashtu se përfundimi i luftës në Ukrainë është “një nga sfidat më të mëdha për botën e lirë” që ka ndodhur në dekadat e fundit.
Duda u bëri thirrje udhëheqësve të vendeve të tjera që të vazhdojnë të ndihmojnë Ukrainën. Ai tha se Polonia ishte vendi i parë që i dha Ukrainës “ndihmë jashtëzakonisht të madhe në mes të agresionit rus”. Ai vuri në dukje se pajisjet e transferuara nga Varshava në Kiev që nga fillimi i pushtimit rus në shkallë të plotë përfshijnë tanke, municione, pushkë automatike Grot, obus vetëlëvizës Krab, etj.
Duda nuk specifikoi saktësisht se sa tanke do të transferonte Polonia në Ukrainë, por sipas strukturës së ushtrisë polake, një kompani tankesh përbëhet nga 14 tanke. /FolDrejt/
