Një lezion lëkure i hequr nga gjoksi i presidentit amerikan Joe Biden në shkurt ishte karcinomë e qelizave bazale, tha të premten mjeku i tij.
Biopsia është bërë më 16 shkurt, kurse Dr. Kevin O’Connor tha se rezultatet nga testimi i mëpasshëm ishin “të pritshme”. Nuk kërkohet trajtim shtesë, shkroi ai në një letër të shpërndarë nga Shtëpia e Bardhë, shkruan AA, transmeton Fol Drejt.
“I gjithë indi kanceroz i lëkurës është hequr”, shkroi O’Connor.
“Vendi i biopsisë është shëruar mirë dhe presidenti do të vazhdojë mbikëqyrjen dermatologjike si pjesë e kujdesit të tij të vazhdueshëm shëndetësor gjithëpërfshirës”, shtoi ai.
Mjeku tha se karcinoma e qelizave bazale “nuk ka tendencë të ‘përhapet’ ose metastazojë, siç priren të bëjnë disa kancere më serioze të lëkurës si melanoma ose karcinoma e qelizave skuamoze”. Por ai vuri në dukje se ata kanë potencial për t’u rritur, gjë që mund të komplikojë operacionet për heqjen e tyre.
O’Connor shkroi në një përmbledhje të shëndetit të presidentit të 16 shkurtit se Biden kishte “hequr disa kancere të lëkurës të lokalizuara dhe jo-melanoma” përpara inaugurimit të tij në janar 2021 dhe më pas vuri në dukje se presidenti kishte hequr një lezion lëkure dhe e kishin dërguar për testim./FolDrejt/
