Presidenti i Kazakistanit, Kassym-Jomart Tokayev, ka urdhëruar forcat e sigurisë që të “qëllojnë për të vrarë pa paralajmërim”, ndërsa trazirat vazhdojnë në shtetin e Azisë Qendrore.
Në një fjalim televiziv të premten, Tokayev paralajmëroi se demonstruesit do të “shkatërroheshin” si pjesë e një operacioni të fuqishëm “antiterrorist”.
Në pothuajse një javë protesta, dhjetëra janë vrarë, përfshirë qytetarë dhe policë. Kriza shënon dhunën më të keqe që ka parë Kazakistani që nga fitimi i pavarësisë tre dekada më parë, shkruan Aljazeera, transmeton Klankosova.tv.
Ministria e Brendshme tha se 26 “kriminelë të armatosur” ishin “likuiduar” dhe më shumë se 3 mijë u arrestuan që nga fundjava e kaluar, ndërsa 18 policë dhe anëtarë të shërbimit të gardës kombëtare ishin vrarë gjithashtu.
Të shtëna me armë zjarri u dëgjuan të premten në mëngjes, pranë sheshit qendror në qytetin më të madh, Almaty, ku trupat dhe protestuesit luftuan ditët e mëparshme.
Protestat, të cilat janë të rralla në vendin relativisht të qëndrueshëm ish-sovjetik, filluan për rritjen e çmimeve të karburantit. Por tubimet që atëherë janë shndërruar në trazira të dhunshme antiqeveritare.
Me kërkesë të Tokajevit, Rusia ka dërguar “forca paqeruajtëse”. Ata mbërritën të enjten, mes paralajmërimeve nga Perëndimi në Moskë për të respektuar sovranitetin e Kazakistanit.
