Presidenti i Republikës së Kosovës, Hashim Thaçi, sot ka udhëtuar për në Davos të Zvicrës, ku bashkë me liderë nga mbarë bota do të marrë pjesë në Forumin Ekonomik Botëror.
Gjatë qëndrimit në Davos, presidenti Thaçi do të zhvillojë takime të shumta me përfaqësues të shteteve të ndryshme të botës për të thelluar marrëdhëniet bilaterale.
Po ashtu, presidenti Thaçi do të zhvillojë takime edhe me përfaqësues të Bashkimit Evropian, nga të cilët do të kërkojë përshpejtimin e agjendës evropiane për Kosovën.
Ai në një postim në rrjetin social twitter, ka thënë se qëllimi kryesor mbetet arritja e marrëveshjes finale me Serbinë.
“Duke pritur për Forumin në Davos. Do të takohem me shumë liderë botërorë dhe palë tjera të interesit – qëllimi kryesor mbetet për ta mbështetuar arritjen e marrëveshjes gjithpërfshirëse në mes Kosovës dhe Serbisë, duke hapur rrugën për anëtarësimi në NATO dhe Bashkim Evropian”, ka shkruar Thaçi.
Ky Forum i përvitshëm mbledh në Davos rreth 3,000 liderë shtetërorë, përfaqësues të bizneseve, të organizatave ndërkombëtare, shoqërisë civile, etj. /foldrejt.com
