Presidenti turk Rexhep Tajip Erdogan priti të enjten kryeministrin pakistanez Shehbaz Sharif në kryeqytetin Ankara për bisedime, shkruan Anadolu Agency, përcjell Fol Drejt.
Sipas presidencës turke, Erdogan dhe Sharif zhvilluan një takim me dyer të mbyllura në kompleksin presidencial.
Gjatë vizitës së tij në Turqi, Sharif do të vizitojë gjithashtu zonën e goditur nga tërmeti dhe do të bashkëveprojë me ekipet pakistaneze të kërkim-shpëtimit të vendosura në zonë.
Në një deklaratë, Ambasada e Pakistanit në Ankara tha se Sharif i shprehu ngushëllimet e përzemërta Erdoganit dhe kombit turk për humbjen tragjike të mijëra jetëve.
Duke kujtuar marrëdhëniet vëllazërore mes Pakistanit dhe Turqisë, kryeministri tha se populli i Pakistanit ndjeu të njëjtën dhimbje dhe ankth si vëllezërit dhe motrat e tyre turq.
“Kryeministri shtoi se populli i Pakistanit nuk do të pushojë derisa personi i fundit në zonat e prekura nga tërmeti të rehabilitohet plotësisht”, shtoi ai.
Sipas deklaratës, Erdogan falënderoi Sharifin për mbështetjen “e fortë dhe të qëndrueshme” të Pakistanit për Turqinë pas tërmeteve shkatërruese dhe ripohoi se kombi i vendosur turk do të dalë nga kjo fatkeqësi natyrore me forcë dhe vendosmëri më të madhe.
Sharif ishte ndër liderët botërorë që kishte folur me Erdoganin më 6 shkurt pasi dy tërmete të forta goditën Turqinë jugore, duke marrë jetën e më shumë se 36,180 njerëzve.
Lëkundjet me magnitudë 7.7 dhe 7.6 u përqendruan në Kahramanmaras dhe goditën 10 provinca të tjera – Hatay, Gaziantep, Adiyaman, Malatya, Adana, Diyarbakir, Kilis, Osmaniye, Sanliurfa dhe Elazig. Më shumë se 13 milionë njerëz janë prekur nga tërmetet shkatërruese.
Ngushëllimet kanë ardhur nga e gjithë bota duke shprehur solidaritet me Turqinë, me shumë vende që dërgojnë ekipe shpëtimi dhe ndihmë. /FolDrejt/
