Presidenti turk Rexhep Tajip Erdogan premtoi të mërkurën se do të shërojë plagët e viktimave të tërmeteve të fuqishëm që goditën rajonin jugor të vendit muajin e kaluar, duke marrë më shumë se 45,000 jetë, shkruan Anadolu Agency, përcjell Fol Drejt.
“Shpresojmë se do të fshijmë gjurmët e tërmetit të 6 shkurtit sa më shpejt të jetë e mundur,” tha Erdogan në mbledhjen e grupit të Partisë për Drejtësi dhe Zhvillim (AK) në parlament.
Tërmetet me magnitudë 7.7 dhe 7.6, me qendër në Kahramanmaras, goditën 10 provinca të tjera – përfshirë Hatay, Gaziantep, Adiyaman, Malatya, Adana, Diyarbakir, Kilis, Osmaniye, Sanliurfa dhe Elazig. Rreth 13.5 milionë njerëz në Turqi janë prekur nga tërmetet shkatërruese.
Të gjithë shkencëtarët e quajtën procesin “jo të zakonshëm”, tha Erdogan, duke shtuar: “Turqia është goditur nga një stuhi tërmeti”.
“Ne do të heqim mbeturinat, do të shërojmë plagët, do të zëvendësojmë shtëpitë e shembura me tjera të ndërtuara mirë, do të fitojmë zemrat, do të ndërtojmë një të ardhme të re dhe një jetë të re për njerëzit tanë”, u zotua ai.
Ndërkohë, për zgjedhjet e ardhshme presidenciale dhe parlamentare në Turqi, presidenti sinjalizoi se zgjedhjet do të mbahen më 14 maj, duke iu përmbajtur planit të mëparshëm.
“Dijeni mirë se ky komb do të bëjë atë që është e nevojshme më 14 maj”, u tha Erdogan ligjvënësve.
Pas tërmeteve shkatërruese, pati zëra se zgjedhjet mund të shtyheshin deri në fund të vitit ose mund të mbaheshin siç ishte planifikuar më 18 qershor.
Erdogan tha më parë se 14 maji është data “më e përshtatshme” për mbajtjen e zgjedhjeve. /FolDrejt/
