Dua Lipa ka marrë titullin Ambasadore Nderi nga presidentja Osmani.
Lajmin e bëri të ditur vetë presidentja, e cila në profilin e saj zyrtar në facebook, njëkohësisht ka falenderuar këngëtaren për gjithçka që ka bërë dhe që përmes saj po dëgjohet zëri i shoqërisë kosovare nëpër botë, shkruan Fol Drejt.
Ajo e ka konsideruar këngëtaren Lipa si inspirim e model për vajzat anekënd botës.
Osmani tutje është shprehur se për shkak të Dua Lipës nuk ka njeri që nuk e njeh Kosovën e që edhe këtë vit është bërë kryqendër e kulturës botërore përmes festivalit Sunny Hill./FolDrejt/
Postimi i plotë i presidentes Osmani:
Sot, Dua Lipës, i ndava titullin Ambasadore Nderi e Republikës së Kosovës, sepse ajo vazhdon ta nderojë vendin tonë në çdo hap e çdo paraqitje. E falenderova, në emër të të gjithë qytetarëve të Republikës së Kosovës për gjithçka që ka bërë dhe po bënë që zëri ynë të dëgjohet kudo në botë.
Dua dhe Anda kishin kënaqësinë e veçantë ta takojnë super yllin tonë, ikonën e pop muzikës, e cila është shndërruar në inspirim e model për vajzat anekënd botës. Ajo po e shfrytëzon zërin dhe talentin e saj të jashtëzakonshëm, jo vetëm për t’i ofruar botës këngë që lënë gjurmë, por edhe për ta prezantuar imazhin më të mirë të Kosovës kudo në botë. Sot, për shkak të Duas, nuk ka njeri që nuk e njeh Kosovën, të cilën edhe kësaj radhe e ka bërë kryeqendër të kulturës botërore, nëpërmjet festivalit Sunny Hill.
Prandaj sot në Presidencë, së bashku me Prindonin dhe vajzat tona, kishim kënaqësinë që ta presim Duan së bashku me prindërit e saj, Dukagjinin dhe Anesën, për t’i falënderuar për këtë kontribut të madh për imazhin e Kosovës në botë si dhe për ta përsëritur mesazhin tonë të përbashkët për liberalizim të vizave për qytetarët e Kosovës, i cili njëherit është edhe moto e edicionit të sivjetëm të festivalit Sunny Hill.
Faleminderit Dua e mirëserdhe në shtëpi!
