Vjosa Osmani, Presidente e Republikës së Kosovës, në Ditën Kombëtare të të Pagjeturve, njëkohësisht edhe përvjetorin e Masakrës së Mejës, e ka përkujtuar këtë ditë.
Presidentja Osmani ka thënë se:
“Janë mbi 1600 të zhdukur me dhunë, thirrja jonë për drejtësi, e cila do të vihet në vend kur para saj do të dalin autorët e krimeve dhe do të zbardhet fati i secilit nga njerëzit tanë” – duke shtuar se “insistojmë të dimë për fatin e tyre.”
“Kjo ditë na bën ta kthejmë kokën pas jo vetëm për t`i kujtuar ata që nuk janë në mesin tonë, por edhe për ta thënë fuqishëm se për ta nuk është vetëm një ditë si kjo, por çdo ditë. Me kujtimin për ta, do të bëjmë çdo ditë përpjekje që pritja e familjeve të marrë fund…
Synimi i regjimit gjenocidal serb ishte spastrimi etnik ndaj aksioni kriminal u shtri në 15 fshatra të Rekës së Keqe dhe Luginës së Çarragojës në Gjakovë. Meja është dhimbje e madhe e Kosovës dhe ndër rrëfimet më të përgjakshme të luftës. Nuk do ta harrojmë kurrë, sepse vetëm kësisoj do ta dimë vlerën e lirisë dhe shtetit. Do t`i kujtojmë përherë martirët e Mejës duke u angazhuar vazhdimisht që autorët të vihen para drejtësisë”, ka thënë më tej presidentja.
Sot janë mbushur 23 vite që nga dita kur u krye njëra ndër masakrat më të mëdha ndaj shqiptarëve gjatë luftës në Kosovë, nga forcat serbe. Në këtë datë është përcaktuar edhe Dita e të Zhdukurve të Kosovës. Vendi ynë ende nuk di asgjë për fatin e 1600 të zhdukurve./FolDrejt/
