Presidentja e Republikës së Kosovës Vjosa Osmani ka dhënë një intervistë për tabloidin britanik “The Sun Online”, shkruan Fol Drejt.
Ndër të tjera Presidentja Osmani ka folur për situatën aktuale në Kosovë, ndërsa ka theksuar se Serbia po vijon të përdorë taktika ruse kundrejt vendit tonë.
“Paqja në Ballkanin Perëndimor është shumë e lidhur me paqen në Londër, në Nju Jork, në Uashington, në Paris, në Berlin, sepse historia tregon se mungesa e paqes dhe sigurisë në Evropë është mungesë e paqes dhe sigurisë ndërkombëtare. Dhe kjo mungesë paqeje dhe sigurie në Ballkanin Perëndimor do të thotë një Evropë e destabilizuar” – ka thënë ajo ndër të tjera.
Ajo ka folur edhe për raportet me Serbinë duke ia kujtuar opinionit ndërkombëtar se ajo udhëhiqet nga një autokrat, mendjen e të cilit vështirë mund ta kuptosh.
“Unë besoj se ai po tregon qëllimin e tij. Të gjitha këto tregojnë se është pikërisht i njëjti plan. Dhe gjuha që përdoret nga disa politikanë serbë është gjithashtu jashtëzakonisht e ngjashme me komentet e Putinit për Ukrainën”, ka deklaruar Osmani.
Presidentja është shprehur se për shkak të këtij konteksti të brisht, ka kërkuar në vijimësi mbështetjen e Perëndimit. Më tej ajo ka thënë se në veri nga Serbia janë mbështetur grupet kriminale të cilat edhe kanë kryer krime ndaj qytetarëve të pafajshëm, duke i përfshirë këtu edhe serbët.
Sipas Osmanit është keq që në marrëveshjet e fundit nuk përfshihet njohja reciproke, meqë vetëm një gjë e tillë “është zgjidhja e vetme që mund të çojë në paqe dhe stabilitet afatgjatë”, meqenëse kjo do të shtynte Serbinë të kuptojë një herë e mirë se “realiteti i Kosovës si shtet i pavarur sovran është një realitet që do të ekzistojë përgjithmonë, ne nuk do të kthehemi, kjo nuk do të ndryshojë.”/FolDrejt/
