Presidentja e vendit, Vjosa Osmani, ka pritur sot në takim lamtumirës përfaqësuesen rezidente të UNDP-së në Kosovë, Maria Suokko, raporton Fol Drejt.
“Presidentja Vjosa Osmani priti sot në takim lamtumirës përfaqësuesen rezidente të UNDP-së në Kosovë, znj. Maria Suokko, të cilën e falënderoi për angazhimin e saj përgjatë katër viteve të fundit në zbatimin e projekteve me në qendër të tyre mbështetjen e mirëqenies së qytetarëve të Kosovës.”, shkruan në raportin e Zyrës së Presidentes.
Presidentja Osmani ka vlerësuar lartë kontributin e UNDP-së në mbështetjen e shumë programeve dhe projekteve në Kosovë, me theks të veçantë tek ato për gratë, rininë, mjedisin, ndryshimet klimatike dhe personat me nevoja të veçanta. Në takim u diskutua për bashkëpunimin e mirëfilltë ndërmjet Zyrës së Presidentes dhe UNDP-së gjatë edicionit të kaluar të Forumit për Gratë, Paqen dhe Sigurinë dhe nismës së mbjelljes së drunjve, nisma të cilat vazhdojnë edhe këtë vit.
Suokko ka shprehur falënderimin e sinqertë për bashkëpunimin me Presidenten Osmani dhe zyrën e saj dhe në të njëjtën kohë e njoftoi edhe për projektet e reja që priten të fillojnë të zbatohen gjatë muajve në vazhdim në Kosovë. /FolDrejt/