Presidentja e Republikës së Kosovës Vjosa Osmani, e cila po merr pjesë në Samitin e liderëve evropianë në Moldavi, së fundi ka thënë se nuk e ka në plan të takohet me Aleksandër Vuçiqin, shkruan Fol Drejt.
Presidentja ka thënë se është në mandatin e Brukselit të caktojë datën e takimit të Kosovës dhe Serbisë, në kuadër të procesit të bisedimeve.
Sipas saj, ne si rajon “e në veçanti si Kosovë jemi vazhdimisht përball sfidës së ndikimeve hibride që Rusia dhe satelitët e saj janë duke tentuar që t’i shtyjnë përpara për ta destabilizuar Evropën” – ka thënë ajo, duke e cilësuar Serbinë si “satelit i Rusisë”.
Osmani ka thënë se ndodhet në Moldavi “për të kërkuar përkrahjen e partnerëve tanë për t’i luftuar këto tendenca si dhe të parandalohet ndikimi i këtyre tendencave dhe propagandës. Vuçiqi është i interesuar që përmes bandave kriminale të destabilizojë vendin, s’duhet të lejohet një gjë e tillë”
Për këtë presidentja ka theksuar se koordinimi me aleatët tanë është shumë i rëndësishëm.
Gjatë këtij samiti, presidentja tha se do të ketë takime me shumë liderë evropianë, teksa theksoi se është e rëndësishme të takohet me ta për t’iu shpjeguar se çka po ndodh aktualisht në veri.
“Përveç presidentit Macron dhe kancelarit Scholz, kam takime me pothuajse të gjithë liderët që marrin pjesë në këtë samit. Është me rëndësi që të kërkojmë përkrahjen e tyre për aplikimin e Kosovës në BE dhe ecjen përpara në Këshill të Evropës, por edhe të shpjegojmë në detaje se çka po ngjan në veri të Kosovës. Një numër i madh i liderëve kanë shprehur interesim për t’u takuar në mënyrë që të gjejmë një zgjidhje për shtensionimin e situatës. Po ashtu, do të kërkoj ndihmën e tyre që t’i luftojnë grupet kriminale në veri që po destabilizojnë vendin tonë”, ka vijuar më tej Osmani.
Presidentja prej atje ka thënë se është shumë me rëndësi që Serbia t’i ndërpres veprimet destabilizuese. Sipas Presidentes Osmani, personat të cilët janë involvuar në protestat e serbëve në veri të vendit, janë instrumente politike të vetë Beogradit. Për më tepër sipas saj, ata janë persona të cilët ndodhen në listën e zezë të Shteteve të Bashkuara të Amerikës dhe Britanisë./FolDrejt/
