Vjosa Osmani ka realizuar një udhëtim zyrtar për në Francë, shkruan Fol Drejt.
Presidentja e Republikës së Kosovës do të marrë pjesë në Forumin e Paqes në Paris përkrah liderëve të tjerë botërorë e udhëheqësve të organizatave ndërkombëtare.
Përgjatë këtij forumi, ku ajo është ftuar së bashku me Zotërinë e Parë, Prindon Sadriu, do të marrë pjesë në pritjen e organizuar nga Presidenti Macron dhe Zonja e Parë e Francës për liderët botërorë, e po ashtu do t’i drejtohet panelit të diskutimit mbi bashkëpunimin në kohë kritike për kontinentin tonë bashkë me presidenten e Hungarisë Katlin Novák, si dhe Jean-Marie Guéhenno – thuhet në njoftimin zyrtar.
Krahas aktiviteteve të forumit, presidentja e Kosovës do të zhvillojë takime bilaterale me liderë tjerë për të diskutuar thellimin e bashkëpunimit për tejkalimin e sfidave aktuale të paqes dhe sigurisë.
Edicioni i pestë i Forumit të Paqes në Paris do të mbledhë liderë nga mbarë bota, si dhe përfaqësues të lartë të organizatave ndërkombëtare, bizneseve, bankave zhvillimore për të diskutuar eliminimin e krizave të shumëfishta globale, duke promovuar forcimin e bashkëpunimit dhe multilateralizmit./FolDrejt/
