Profesoresha e Mjekësisë, Hatixhe Latifi-Pupovci, ka folur për sulmin e saj nga një prind i një studenti.
Në një intervistë ekskluzive për Gazeta Blic, ajo ka rrëfyer se si ka ndodhur ngjarja, derisa ka thënë se studenti nuk ka arritur ta kalojë provimin e prindi i tij ka qenë duke e pritur jashtë dhe më pas ai ka shkuar që të flas me të, derisa i është prezantuar si doktor Arsimi, gjinekolog.
“Unë nuk e kam njohur përpara. Normalisht prej mirësjelljes u çova dhe e përshëndeta, i thashë urdhëro ulu, nuk e kam zakon të flas me prind të studentëve por meqenëse qenke koleg, po bisedojmë. Filloi me bisedu, jo tha nuk ke të drejtë pasi djali ka qenë në provim me shkrim njëherë, i thashë që ajo është pjesë e provimit dhe pastaj tha, nuk guxon, i thashë që këtu çka guxoj e di unë. Më tha, a e ke mëndu se çka ndodhë pas kësaj. I thash jo nuk e kam mendu, se kom zakon me mendu se çka ndodhë dhe u çu më goditi me grusht. Normalisht unë nuk jam njeri që pranoj me qenë e dhunume prej askujt edhe u vetëmbrotja, me aq sa kam pas mundësi me u vetëmbrojt”, tha ai.
Profesoresha shtoi se janë pamjet dhe shihet dhuna që ai ka ushtruar ndaj saj dhe më pas tregon se e ka thirrur kolegen por ajo nuk e ka ditur se çfarë po ndodhë, pavarësisht zhurmës.
Latifi-Pupovci shton se derisa ajo ka vazhduar duke bërtitur për të kërkuar ndihmë, doktori kishte dalë jashtë.
Sipas saj, e gjitha ka qenë e paramenduar pasi babai i studentit ka pritur 1 orë jashtë, derisa djali i tij ka qenë brenda në provim.
Profesoresha mendon se gjyqësia duhet ta trajtojë këtë rast si shumë të rëndësishëm pasi ka ndodhur në një institucion, në vendin e punës dhe se mjeku që e ka ushtruar dhunën, sipas saj, nuk mund ta ushtrojë profesionin me rekorde të tilla të dhunës, teksa e quan të pabesueshme që ai të vazhdojë ta ketë licencën e punës si mjek./Gazeta Blic/
