Prokurorët filluan të hetojnë saktësisht se çfarë ndodhi përpara se një oficer policie qëlloi për vdekje 17-vjeçarin Nahel M në Francë. Polici është akuzuar për vrasje dhe ndodhet në paraburgim. Vrasja e të riut shkaktoi protesta të dhunshme në të gjithë vendin, raporton Klix, përcjell Fol Drejt.
Pas marrjes në pyetje të dëshmitarëve dhe rishikimit të pamjeve të vëzhgimit me video, prokurorët thanë se kur policia e kapi të riun, ai injoroi kërkesat për të ndaluar. Me këtë rast, punonjësi i policisë ka përdorur një armë zjarri.
Ndërkohë, adoleshenti, i cili ndodhej edhe në makinë, ka bërë të ditur se policët e kanë goditur Nahelin tre herë me kondakët e pistoletës dhe se më pas ai ka hequr këmbën nga frena e makinës. Prokurorët do të bisedojnë me këtë dëshmitar nesër.
Çfarë thanë tjetër prokurorët?
Sipas prokurorit Pascal Prache, dy policë me motoçikleta kanë pikasur një Mercedes me targa polake më 27 qershor në orën 08:00. ndërsa lëvizte përgjatë korsisë së autobusit. Ata ndezën sirenën, kapën makinën në semafor dhe gjetën në automjet tre të rinj.
I thanë Nahelit të parkonte makinën anash, por ai nuk e bëri këtë – ai vazhdoi të lëvizte pavarësisht se drita e kuqe ishte ndezur. Policia bëri ndjekje, për të cilën njoftoi njësinë e tyre përmes radios.
Në orën 08:16, Mercedes u fut në një bllokim të madh trafiku. Policia e kapi sërish, zbriti nga motori, nxorri armët dhe iu afrua makinës. Ata u thanë prokurorëve se i drejtuan armët shoferit për ta penguar atë të vazhdonte të ikte.
Sipas tyre, ata i kanë kërkuar që të fikte automjetin, por makina është nisur. Në atë moment njëri prej policëve ka qëlluar në gjoks Nahelin duke e vrarë. Pasi mjeti është përplasur me gardhin buzë rrugës, njëri prej pasagjerëve është arrestuar, ndërsa tjetri është larguar në këmbë.
Çfarë thanë dëshmitarët?
Adoleshenti, i cili ishte me Nahelin dhe një person tjetër, tha se ata po kalonin me makinë nëpër Nanterre (qytet afër Parisit), u kthyen në korsinë e autobusit dhe u ndoqën nga dy policë me motoçikleta.
Pasi Naheli ndaloi mjetin, siç ka thënë për gazetën Le Parisien, një nga policët e ka goditur me kondakun e pistoletës. Sipas deklaratave të tij, një tjetër polic më pas e ka goditur dhe kolegu i tij e ka bërë sërish.
Është vlerësimi i tij se goditja e tretë bëri që Naheli të hiqte këmbën nga frena dhe të nisej mjeti. Kur oficeri e qëlloi, thotë ai, trupi i tij u përkul përpara dhe ai goditi gazin. Ai pretendon se është larguar nga vendi i ngjarjes pasi kishte frikë se edhe ai do të pushkatohej.
Makina ishte me qera
Pyetje po bëhen edhe për veturën Mercedes AMG të klasit A. Autoritetet theksuan se ishte një automjet i marrë me qira. Mirëpo, i riu i përmendur, dëshmitari, nuk ka dashur të japë detaje rreth marrjes me qira të veturës.
Sipas revistës franceze të automobilave Autoplus, makina me targa polake mund të merret me qira nga 300 deri në 3000 euro në ditë. Siç shkruan kjo revistë, marrja me qira afatshkurtër e makinave është e popullarizuar në mesin e të rinjve francezë. /FolDrejt/
