Dibër, 25 shkurt – Në Dibër u promovua libri i autorit dr.sc Xhemal Çupi “Kultura Politike – rast studimi R. Maqedonisë së Veriut”. Në promovimin që u mbajt në restorantin “Uraniku”, recensenti prof.dr. Nazmi Maliqi theksoi se në këtë libër janë marrë në konsideratë botëkuptimet bashkëkohore për politikën dhe organizimin politik, proceset demografike, respektimi i të drejtave të njeriut, stabiliteti dhe bashkëpunimi i brendshëm dhe regjional, si dhe botëkuptimet të qarta për kulturën politike. Me rëndësi të veçantë, tha Maliqi, është analiza për rolin e kulturës në ndërvarësi apo e marrëdhënieve në mes njerëzve dhe grupeve etnike që paraqesin faktorin bazë për një shoqëri stabile në Republikën e Maqedonisë së Veriut. Autori, sipas Maliqit, konstaton se përmes kulturës politike participuese, do të ngriten themele për dialog dhe komunikim ndëretnik të mirëfilltë dhe do të krijoheshin mundësi për besim dhe afrim më të madh midis popujve që jetojnë në këtë shtet.
“Ky publikim vjen në një kohë të ndryshimeve socio-ekonomike dhe politike në vend dhe në rajon dhe sjell një valë të tretë Hejvuiane, e cila përcillet me formimin e shteteve të reja dhe humbjen e besimit tek institucionet dhe politikbërësit aktual”, theksoi recensuesi tjetër prof.dr. Jonuz Abdullai. Ai shtoi se kjo periudhë konsiston me 3o vjetorin nga rrëzimi i Murit të Berlinit dhe heqjen e Perdes së Hekurt, e cila ndante jo vetëm Gjermaninë, por edhe tërë Evropën, duke i hapur dyert integrimit euroatlantik. “Në këtë frymë, autori dibran trajton problemet sa interesante po aq edhe sfiduese për rrethanat e vendit në të cilin kanë ndodhur ndryshime të mëdha politike dhe juridike, të përcjellura me përplasje dhe konflikte kulturore, etnike, fetare e deri tek luftë të hapur në shtetet e Ballkanit Perëndimor”, tha Abdullai.
Duke përshëndetur të pranishmit në promovim, mes të cilëve pati përfaqësues të partive politike, shoqatave qytetare dhe intelektualë dibran, autori Xhemal Çupi theksoi se kultura politike ka një rol të padiskutueshëm në ngritjen të vetëdijes kolektive, por kur këtë ia veshin kontekstin politik, atëherë çështja bëhet me komplekse, ashtu siç është komplekse edhe vetë politika. Autori shtoi se kultura politike si studim ndërdisiplinor vlen të analizohet për dy çështje. “E para për shkak të qëndrimit të qytetarëve ndaj sistemit politik dhe për shkak të arsyes së dytë – e ajo është se duke kuptuar natyrën e marrëdhënieve midis kulturës politike dhe performancës së sistemit, ne aftësohemi të vlerësojmë mjetet, me të cilët mund të sjellim ndryshimet progresive në politikë”. (koha.mk)
