Punonjësit e administratës së presidentit rus u udhëzuan të zëvendësojnë iPhone me smartphone të markave të tjera dhe me një sistem tjetër operativ deri në fund të marsit, raporton Klix, përcjell Fol Drejt.
Sipas burimeve të kompanisë së lajmeve, kërkesa e dërguar punonjësve për të zëvendësuar iPhone lidhet me çështje sigurie. Kremlini beson se këto pajisje janë më të ndjeshme ndaj hakerimit dhe spiunazhit nga ekspertët perëndimorë në krahasim me telefonat inteligjentë të tjerë.
Punonjësit e administratës së Putinit u këshilluan të blinin telefona me sistemin operativ Android, homologët e tij kinezë ose Aurora OS (një sistem operativ rus i smartfonëve të bazuar në Linux).
Aurora OS u zhvillua nga kompania ruse Open Mobile Platform, një degë e Rostelecom.
Burimet e gazetës thonë se Kremlini madje mund të blejë telefona të rinj “të sigurt” për punonjësit e tij për ta bërë më të lehtë për ta që të heqin dorë nga teknologjia amerikane.
Kjo nuk është hera e parë që autoritetet federale u japin rekomandime zyrtarëve për përdorimin e pajisjeve ose teknologjive të tyre. Në verën e vitit 2022, zyrtarët rusë u këshilluan të ndalonin përdorimin e Zoom në favor të Trueconf vendas. /FolDrejt/
